নিয়মীয়া বাৰ্তা, ২০ নৱেম্বৰঃ বিটিচি নির্বাচনৰ বাবে অসমত ক’ভিড সংক্রমণ বৃদ্ধি নহয় বুলি আশা ব্যক্ত কৰিছে স্বাস্থ্যমন্ত্রী ড০ হিমন্ত বিশ্ব শর্মাই৷ গুৱাহাটীত আয়োজিত এখন সংবাদ মেলত মন্ত্রী ড০ শর্মাই কয় যে বিটিচি নির্বাচনৰ বাবে ক’ভিডৰ সংক্রমণ যাতে বৃদ্ধি নাপায়, তাৰ বাবে চৰকাৰে প্রয়োজনীয় ব্যৱস্থা গ্রহণ কৰিছে৷ অহা ডিচেম্বৰৰ পৰা ১৫ জানুৱাৰীৰ ভিতৰত জনসাধাৰণে সেই ছবিখন দেখিবলৈ পাব বুলি তেওঁ আশা প্রকাশ কৰে৷
ৰাজ্যৰ ক’ভিড পৰিস্থিতি উন্নত অৱস্থালৈ অহাৰ বিষয়ে জানিবলৈ দি তেওঁ কয় যে গুৱাহাটী চিকিৎসা মহাবিদ্যালয় হাস্পতালত ১,২০০ লোকৰ নমুনা পৰীক্ষা কৰা হয়৷ সেইসকল লোকৰ ভিতৰত মাত্র দুগৰাকীৰহে পজিটিভ ওলাইছে৷ এই প্রসংগতে তেওঁ আৰু কয় যে সদ্যহতে বিটিচি নির্বাচন অনুষ্ঠিত কৰাৰ তেওঁ পক্ষপাতী নাছিল৷ তেওঁৰ ইচ্ছা আছিল এই নির্বাচন অহা মার্চ মাহলৈ পিছুৱাই ৰখাৰ৷ কিন্তু ৰাজ্য চৰকাৰে আয়োজন কৰা সর্বদলীয় বৈঠকত কংগ্রেছ, এ আই ইউ ডি এফ, বি পি এফ সকলোৱে অতি সোনকালে বিটিচি নির্বাচন অনুষ্ঠিত কৰাৰ দাবী জনালে৷
সর্বদলীয় বৈঠকখনত স্বাস্থ্যমন্ত্রী হিচাপে তেওঁ ক’ভিড পৰিস্থিতি ৰাজ্যখনত নিয়ন্ত্রণলৈ অনাৰ কথা উল্লেখ কৰি তেওঁ বিটিচি নির্বাচনো সুকলমে অনুষ্ঠিত কৰিব পাৰিব বুলিহে কয়৷ ইয়াৰ বাবেই বিটিচি নির্বাচন অনুষ্ঠিত কৰা হৈছে৷ বিটিচি নির্বাচন অনুষ্ঠিত হোৱাৰ পাছত পৰীক্ষণ কৰিলে ক’ভিডত আক্রান্ত ৰোগীৰ সংখ্যা বৃদ্ধি নহ’ব৷ স্বাভাৱিকভাৱে দুই–এজন ৰোগী ওলাব৷ কিন্তু বহুত বেছি সামূহিক পর্যায়ত সংক্রমণ এতিয়া নাই৷