নিয়মীয়া বাৰ্তা, ২১ নৱেম্বৰঃ ছাহাৰাৰ মুৰব্বী সুব্রত ৰয়ে কাৰাগাৰৰ বাহিৰত থাকিবলৈ হ’লে ৬২,৬০০ কোটি টকা আদায় দিব লাগিব৷ শীঘ্রে এই ধন আদায় নিদিলে সুব্রত ৰয়ক পুনৰ কাৰাগাৰলৈ প্রেৰণ কৰিব লাগে বুলিও যুক্তি দর্শোৱা হৈছে উচ্চতম ন্যায়ালয়ত৷ দেশৰ বজাৰ নিয়ামক সংস্থা ছিকুইৰিটিজ এণ্ড এক্সচেঞ্জ ব’ড অৱ ইণ্ডিয়াই (ছেবি) শেহতীয়াকৈ এই কথা ঘোষণা কৰিছে৷
ছেবিৰ তৰফৰ পৰা উচ্চতম ন্যায়ালয়ত দাখিল কৰা এক আবেদনত অনুৰোধ জনোৱা হৈছে যে ছাহাৰা গ্রুপৰ অধ্যক্ষ সুব্রত ৰয়ক শীঘ্রে ৬২,৬০০ কোটি টকা আদায় দিয়াৰ নির্দেশ দিব লাগে৷ উল্লেখনীয় যে বর্তমান পেৰলত কাৰাগাৰৰ বাহিৰত আছে সুব্রত ৰয়৷ শীঘ্রে উল্লিখিত ধনৰাশি আদায় নিদিলে সুব্রত ৰয়ৰ পেৰল নাকচ কৰিব লাগে বুলিও ছেবিৰ পৰা শীর্ষ আদালতখনত অনুৰোধ জনোৱাৰ লগে লগে ছাহাৰা গ্রুপৰ মুৰব্বীগৰাকীৰ ভৱিষ্যতলৈ পুনৰ নামি আহিছে সংকট৷
ছেবিৰ মতে, ছাহাৰ ইণ্ডিয়া পৰিবাৰৰ দুটা কোম্পানীৰ সূতসহ আদায় দিবলগীয়া ধনৰ পৰিমাণ ৬২,৬০০ কোটি৷ স্মর্তব্য যে ৮ বছৰ পূর্বে ৰয়ক ২৫,৭০০ কোটি টকা আদায় দিবলৈ নির্দেশ দিয়া হৈছিল৷ ৮ বছৰৰ ভিতৰত এই ধনৰ পৰিমাণ দুগুণতকৈ বেছি হৈছে৷