নিয়মীয়া বাৰ্তা, ২৪ নৱেম্বৰঃ শেহতীয়াকৈ প্রকাশ কৰা খচৰা ভোটাৰ তালিকাৰ পিছত উত্থাপিত দাবী–আপত্তিসমূহ সোনকালে নিষ্পত্তি কৰাৰ বাবে ক্ষিপ্রতাৰে পদক্ষেপ গ্রহণ কৰিব ৰাজ্যৰ নির্বাচন বিভাগে৷ জনতা ভৱনত অনুষ্ঠিত এখন সংবাদ মেলত এই কথা অৱগত কৰে মুখ্য নির্বাচন বিষয়া নীতিন খাৰে৷
তেওঁ জনোৱা মতে, খচৰা ভোটাৰ তালিকাত যিসকল ভোটাৰৰ ফটো সংলগ্ন হোৱা নাই, সেইসকল ভোটাৰৰ ফটো সংলগ্ন কৰি অতি সোনকালে চূড়ান্ত তালিকা প্রকাশ কৰা হ’ব৷
আনহাতে, ভোটাৰ তালিকাত নাম সংশোধন, নাম কর্তন, ভোটকেন্দ্র সালসলনিৰ ক্ষেত্রত অহা ১৮ নৱেম্বৰৰ পৰা ১৬ ডিচেম্বৰৰ ভিতৰত আবেদন কৰিব পাৰিব৷ তদুপৰি অনলাইনযোগেও ব্যক্তিসকলে তেওঁলোকৰ দাবী–আপত্তিসমূহ দাখিল কৰিব পাৰিব৷
উল্লেখ্য যে শেহতীয়াকৈ প্রকাশ কৰা খচৰা ভোটাৰ তালিকা অনুসৰি, ৰাজ্যত মুঠ ভোটাৰৰ সংখ্যা হ’ল ২,২৪,৩৯,৫২২গৰাকী৷ আনহাতে, মুঠ ভোটগ্রহণ কেন্দ্র হ’ল ২৮,২০৫টা৷ নতুনকৈ সংযোজন কৰা হৈছে ৬২টা ভোটগ্রহণ কেন্দ্র৷ চলিত বর্ষৰ ফেব্রুৱাৰী মাহত প্রকাশ পোৱা চূড়ান্ত ভোটাৰ তালিকাৰ বিপৰীতে এইবাৰ খচৰা ভোটাৰ তালিকাত ৭৬,০২০গৰাকী ভোটাৰ বৃদ্ধি পাইছে৷
নির্বাচনী বিষয়াগৰাকীয়ে ইয়াকো উল্লেখ কৰে যে ভোটাৰ তালিকাত নাম অন্তর্ভুক্ত কৰাৰ ক্ষেত্রত সজাগতা বৃদ্ধিৰ বাবে প্রতিখন জিলাত শনিবাৰ আৰু দেওবাৰে অনুষ্ঠিত কৰা হ’ব বিশেষ সজাগতা অভিযান৷ আনহাতে, দাখিল কৰা দাবী–আপত্তিসমূহ নিষ্পত্তি কৰা হ’ব অহা বর্ষৰ ৫ জানুৱাৰীত৷ চূড়ান্ত ভোটাৰ তালিকা প্রকাশ কৰা হ’ব ১৫ জানুৱাৰীত৷