নিয়মীয়া বাৰ্তা, ২৪ নৱেম্বৰঃ ক’ৰোনা ভাইৰাছ মহামাৰীয়ে পুনৰ সংহাৰী ৰূপ ধাৰণ কৰা বিষয়টোত গভীৰ উদ্বেগ প্রকাশ কৰিছে উচ্চতম ন্যায়ালয়ে৷ দেশৰ শীর্ষ আদালতখনে উল্লেখ কৰিছে যে ৰাজ্যসমূহে ক’ভিড মহামাৰীৰ মোকাবিলাৰ বাবে নিজকে সম্পূর্ণৰূপে সাজু নকৰিলে ডিচেম্বৰ মাহত ভয়াৱহ পৰিস্থিতিৰ সৃষ্টি হ’ব পাৰে৷
ইফালে, দিল্লী, গুজৰাট, মহাৰাষ্ট্র আৰু অসমত ক’ৰোনা ভাইৰাছে বর্তমান কেনে পৰিস্থিতিৰ সৃষ্টি কৰিছে, সেই সন্দর্ভত দুদিনৰ ভিতৰতে প্রতিবেদন বিচাৰিছে ন্যায়ালয়ে৷ ন্যায়ালয়ৰ মতে এই চাৰিওখন ৰাজ্যত চলিত মাহত ক’ৰোনা ভাইৰাছৰ সংক্রমণে অধিক দ্রুত ৰূপ ধাৰণ কৰিছে৷ গতিকে ৰাজ্যসমূহৰ পৰা এই বিষয়টো সন্দর্ভত ন্যায়ালয়ে তাৎক্ষণিকভাৱে প্রতিবেদন বিচাৰি ক’ভিড–১৯ মহামাৰীৰ মোকাবিলাৰ ক্ষেত্রত প্রকৃততে ৰাজ্য চৰকাৰসমূহে কেনে ব্যৱস্থা গ্রহণ কৰিছে সেই সন্দর্ভত সবিশেষ জানিব বিচাৰিছে৷