নিয়মীয়া বাৰ্তা , ১৯ ডিচেম্বৰ:-তিৱা স্বায়ত্ব শাসিত পৰিষদৰ তৃতীয় সাধাৰণ নিৰ্বাচনৰ আজি অনুষ্ঠিত ভোট গণনাত ভাৰতীয় জনতা পাৰ্টীয়ে নগাঁও জিলাৰ ১০ টা পৰিষদীয় সমষ্টিত বৃহৎ জয় আজুৰি আনিবলৈ সক্ষম হয়। নগাঁও চহৰস্হিত ডচন উচ্চতৰ মাধ্যমিক আৰু বহুমুখী বিদ্যালয়ত কটকটীয়া নিৰাপত্তা ব্যৱস্থাৰ মাজত অনুষ্ঠিত ভোট গণনাত অন্যান্য ৰাজনৈতিক দলক নসাৎ কৰি আটাইকেইখন আসনতে বিজেপি দলে জয়লাভ কৰে। জিলা খনৰ তিৱা পৰিষদীয় সমষ্টিৰ ভিতৰত সমূহত ক্ৰমে-২০ নং বাৰপূজীয়া সমষ্টিত বিজেপি দলৰ কমল বৰদলৈয়ে নিকটতম প্ৰতিদ্বন্দী কংগ্ৰেছৰ অচ্যুত গাঁওখোৱাক ৭২ টা ভোটৰ ব্যৱধানত পৰাজিত কৰে। ২৮নং লুটুমাৰীত বিজেপি দলৰ বিটু বৰদলৈয়ে নিকটতম প্ৰতিদ্বন্দী কৃষ্ণ হোকাইক ৫৯টা ভোটৰ ব্যৱধানত পৰাস্ত কৰে । ইয়াৰ লগতে ২৪নং জোঙালবলহুত সমষ্টিল বিজেপি দলৰ প্ৰাৰ্থী প্ৰনৱজ্যোতি মছৰঙে কংগ্ৰেছৰ মুকুট কোঁৱৰক ৯৫০ টা ভোটৰ ব্যৱধানত পৰাস্ত কৰে।সেইদৰে ২২নং পুখুৰীপাৰ সমষ্টিত বিজেপি দলৰ প্ৰাৰ্থী বিশ্বজ্যোতি পাটৰে কংগ্ৰেছৰ ৰূপামনি ডেকাক ২৩১৮ টা ভোটৰ ব্যৱধানত পৰাস্ত ঈৰা লগতে,কমাৰগাঁৱ সমষ্টিত বিজেপি দলৰ অজিত পাটৰে কংগ্ৰেছৰ নিহা ডেকাৰজাক ১৬৪৫ টা ভোটৰ ব্যৱধানত পৰাস্ত কৰে । ২১নং টোপাকুছিত বিজেপি দলৰ সৰোজ কোঁৱৰে ৪৬৯ টা ভোটত জয়ী হয়। ২৩ নং জৰাবাৰীত বিজেপি দলৰ গীতামণি কলিতা ভূঞাই কংগ্ৰেছৰ ৰিতুমনি দাসক ৩৮২টা ভোটৰ ব্যৱধানত পৰাজিত কৰে। ২৫নং চহৰী সমষ্টিত বিজেপি দলৰ মোহন সেনাপতিয়ে নিৰ্দলীয় প্ৰাৰ্থী দীপেন কোঁৱৰক ৭৩৯ টা ভোটত পৰাস্ত কৰে।অন্যহাতে ৩০নং নামবৰ লালুং সমষ্টিত বিজেপি দলৰ ইন্দ্ৰ বৰদলৈয়ে কংগ্ৰেছৰ শুক্লেশ্বৰী বৰদলৈক ৫৩৬ টা ভোটত আৰু লালুংপাৰ পৰিষদীয় সমষ্টিত ভাৰতীয় জনতা পাৰ্টীৰ মদন বৰদলৈয়ে অগপৰ নগেন বৰদলৈক ১১৫৪ টা ভোটত পৰাস্ত কৰে। বিজেপি দলৰ এই অভাৱনীয় সফলতাই দলটোৰ নেতা- কৰ্মীসকলৰ মাজত আনন্দৰ জোৱাৰ নামি আহিছে। তিৱা পৰিষদৰ নিৰ্বাচনৰ ফলাফল ঘোষণাৰ লগে লগে ভোট গণনা কেন্দ্ৰৰ বাহিৰত বিজেপি দলৰ কৰ্মী সকলে ঢোলে-দগৰে আনন্দ প্ৰকাশ কৰা পৰিলক্ষিত হয়। অন্যহাতে জিলাখনত কংগ্ৰেছ দলে এখনো আসন লাভ কৰিবলৈ সক্ষম নহ’ল।