নিয়মীয়া বাৰ্তা ৩ মাৰ্চঃ মহানগৰীৰ বোন্দা কলনীত এক ভয়ংকৰ অগ্নিকাণ্ড সংঘটিত হয়৷ সেই অগ্নিকাণ্ডত অগ্নিদগ্ধ হৈ এজন যুৱকৰ মৃত্যু হোৱাৰ লগতে এটা বাসগৃহ জ্বলি ছাই হয়৷ অগ্নিদগ্ধ হৈ কৰুণ মৃত্যুক সাবটি লোৱা যুৱকজন জয়চৰণ দেৱনাথ (৩৬) বুলি জানিব পৰা গৈছে৷
ঘটনাৰ বিৱৰণী অনুসৰি সন্ধিয়া প্রায় ৭ বজাত আকস্মিকভাৱে ঘৰটোত অগ্নিকাণ্ড সংঘটিত হোৱা প্রত্যক্ষ কৰে স্থানীয় ৰাইজে৷ পাহাৰৰ ওপৰত থকা বাসগৃহটোত অগ্নিকাণ্ড সংঘটিত হোৱাত ৰাইজে জুই নুমুৱাবলৈ প্রচেষ্টা চলাই যদিও জুইৰ লেলিহান শিখাই ঘৰটোত ছানি ধৰাৰ বাবে জুই নুমাবলৈ সক্ষম হোৱা নাই৷ অগ্নিকাণ্ডৰ সময়ছোৱাত জয়চৰণ দেৱনাথ নামৰ যুৱকজন ঘৰৰ ভিতৰত আবদ্ধ হৈ পৰে৷ কিছুদিনৰ পৰা অসুস্থ হৈ থকাৰ বাবে যুৱকজনে ঘৰৰ পৰা ওলাব পৰা নাছিল বুলিও ৰাইজে সন্দেহ কৰে৷
পিছত আৰক্ষীৰ লোক ঘটনাস্থলিত উপস্থিত হৈ জুই নুমুওৱাৰ লগতে যুৱকজনৰ মৃতদেহ উদ্ধাৰ কৰি মৰণোত্তৰ পৰীক্ষাৰ বাবে জিএমচিএইচলৈ প্রেৰণ কৰে৷ অগ্নিকাণ্ডৰ কাৰণ পোহৰলৈ অহা নাই যদিও আৰক্ষীয়ে ঘটনা সন্দর্ভত তদন্ত অব্যাহত ৰাখিছে৷
উল্লেখ্য যে বাসগৃহটোত বিদ্যুতৰ সংযোগ নথকাৰ বাবেই চাকিৰ পৰা অগ্নিকাণ্ড সংঘটিত হোৱা বুলি ৰাইজে সন্দেহ ব্যক্ত কৰে৷