দুই মহিলাৰ প্রতিদ্বন্দ্বিতাত আকর্ষণীয় হৈছে বটদ্রৱাৰ নির্বাচনী যুঁজ

নিয়মীয়া বাৰ্তা ১৫ মাৰ্চঃ এইবাৰৰ নির্বাচনত অসমৰ ভিতৰত অন্যতম চর্চাত থকা সমষ্টিটো হ’ল বটদ্রৱা সমষ্টি৷ সমষ্টিটোত দুটা প্রধান ৰাজনৈতিক দলৰ পৰা দুগৰাকী মহিলাই প্রতিদ্বন্দ্বিতা আগবঢ়াইছে৷ অগপ–বিজেপি–তিৱা মিত্রজেজাটৰ হৈ বর্তমানৰ বিধায়িকা আঙুৰলতা ডেকাৰ বিপৰীতে কংগ্রেছৰ হৈ শিৱামণি বৰাই প্রার্থিত্ব আগবঢ়াইছে৷ মিত্রজোঁটৰ আঙুৰলতা ডেকাক পৰাভূত কৰাৰ বাবে বদ্ধপৰিকৰ হছে কংগ্রেছ৷ আগবঢ়াইছে প্রাক্তন মুখ্যমন্ত্রী গোলাপ বৰবৰাৰ বোৱাৰী তথা প্রাক্তন কংগ্রেছ বিধায়ক কিৰণ বৰাৰ জীয়ৰী শিৱামণি বৰাক৷ বিডি’ৰ দৰে লোভনীয় চৰকাৰী পদবী ইস্তফা দি শিৱামণিয়ে এইবাৰ এঘড়ী যুঁজিব আঙুৰলতাৰ বিৰুদ্ধে৷ আনহাতে উন্নয়নমূলক কাম–কাজেৰে ৰাইজৰ আশিস লাভ কৰিম বুলি আত্মবিশ্বাসেৰে যুঁজিবলৈ আগবাঢ়িছে আঙুৰলতা ডেকা৷ নির্বাচনলৈ দুসপ্তাহ বাকী থকাৰ সময়ছোৱাত আকর্ষণীয় হৈছে নির্বাচনী দৃশ্যপট৷ কংগ্রেছ প্রার্থী শিৱামণিয়ে সংখ্যালঘুৰ উন্নয়ন নাই হোৱা বুলি কৈ আঙুৰলতা ডেকা আৰু বিজেপিক গালি–গালাজেৰে প্রচাৰ চলাই আগবঢ়াৰ চেষ্টা চলাইছে৷ আনহাতে আজি ব্যতিক্রম দেখা গ’ল আন এগৰাকী প্রার্থীক৷ সমষ্টিটোত জনতা দল ইউনাইটেডৰ প্রার্থী অনুপম বৰুৱাই ঘোষা মাতি ৰাইজলৈ প্রণাম জনাই কোনো প্রার্থীক আক্রমণৰ লক্ষ্য নকৰাকৈ প্রচাৰ চলায়৷

আনহাতে বিধায়িকা আঙুৰলতা ডেকাক আজি জামুগুৰিত আইমাতৃসকলৰ লগত নামৰ ধ্বনিত, ঢ়োলৰ ছেওত নাচি–বাগি মছগুল হোৱা দেখা গ’ল৷ নগাঁও জিলাৰ ঐতিহাসিক জামুগুৰি গৰখীয়া থানত সেৱা গ্রহণ কৰি ৰাইজক আঙুৰলতাই ক’লে– হৰিনামৰ ধ্বনিয়ে মনটোক প্রফুল্ল কৰি তোলাৰ লগতে ভক্তি ভাবনাৰে জীপাল কৰি তোলে৷ এইদৰে ক’ৰবাত যদি বটদ্রৱা প্রকল্পৰ দৰে বহুমুখী ভৱিষ্যদর্শন প্রকল্পৰ কথাকৈ প্রচাৰৰ শীর্ষত থাকি ‘আঙুৰলতা ডেকা জিন্দাবাদ’ ‘বিজেপি জিন্দাবাদ’ ধ্বনি দিয়া দেখা গৈছে আন ক’ৰবাত শিৱামণি জিন্দাবাদ ধ্বনি৷ কিছু সংখ্যালঘু জনবসতিপ্রধান অঞ্চলত মতিউৰ জিন্দাবাদ ধ্বনিৰে আকাশ–বতাহ কঁপাই তুলিছে৷ আজি নির্দলীয় প্রার্থী তথা এ আই ইউ ডি এফৰ প্রাক্তন নেতা মতিউৰ ৰহমানে নির্বাচন সন্দর্ভত বক্তব্য ৰাখি কয় যে মই মনোনয়ন–পত্র দাখিলৰ দিনাই মহাজোঁটবন্ধনৰ কংগ্রেছৰ মনোনীত প্রার্থী শিৱামণি বৰাই পৰাজিত হৈছে৷ মতিউৰৰ প্রতিদ্বন্দ্বিতা বিজেপিৰ আঙুৰলতা ডেকাৰ লগতহে হ’ব৷ মতিউৰেহে সাম্প্রদায়িক বিজেপিক পৰাভূত কৰিব পাৰিব৷ বটদ্রৱাত মহাজোঁট সফল হ’বলৈ নিদিওঁ৷ মহাজোঁটবন্ধনক লৈ এ আই ইউ ডি এফৰ কর্মী–সমর্থকসকল্ অসন্তুষ্ট৷ প্রথম পর্যায়ত অনুষ্ঠিত হ’বলগীয়া ৪৭টা সমষ্টিৰ মাথোন ধিং সমষ্টিতহে এ আই ইউ ডি এফ দলক আসন এৰি দিছে৷ এনেবোৰ কাৰণতে বিধানসভাৰ নির্বাচনত কংগ্রেছ কর্মীৰ ভোট এ আই ইউ ডি এফলৈ আৰু এ আই ইউ ডি এফৰ ভোট কংগ্রেছলৈ নাযাব বুলি ক’লে– বটদ্রৱাৰ নির্দলীয় প্রার্থী তথা এ আই ইউ ডি এফৰ সদ্যপ্রাক্তন সাধাৰণ সম্পাদক মতিউৰ ৰহমানে৷ এনেদৰেই এতিয়া বটদ্রৱাত নির্বাচনৰ গৰম বতাহ ব’বলৈ আৰম্ভ কৰিছে৷