নিয়মীয়া বাৰ্তা, ২৮ ডিচেম্বৰঃ নাগৰিকত্ব সংশোধনী আইনৰ বিৰুদ্ধে ব্ৰহ্মপুত্ৰ উপত্যকাত প্ৰৱল গণআন্দোলন অব্যাহত থকাৰ পূৰ্ণ সুযোগ গ্ৰহণ কৰিছে বৰাক উপত্যকাৰ ছিণ্ডিকেট বাহিনীয়ে । অসমৰ পৰিৱেশ-পৰিস্থিতি অস্থিৰ হৈ থকাৰ সুযোগ লৈ ছিণ্ডিকেট বাহিনীটোৱে পুনৰ আৰম্ভ কৰিছে বাৰ্মিজ চুপাৰিৰ বিয়াগোম কাৰবাৰ । এই অবৈধ চোৰাং ব্যৱসায়ত হাত উজান দিছে ৰাজ্য চৰকাৰৰ আৰক্ষী-প্ৰশাসনে । আৰক্ষী-প্ৰশাসনৰ সেউজ সংকেত পোৱাৰ পাছতে ম্যানমাৰৰ পৰা অসম অভিমুখে ৰাওনা হৈছে ৩,০০০ বার্মিজ চুপাৰিভর্তি ট্রাক ৷ ইতিমধ্যে কাছাৰ জিলাৰ মাজেৰে মেঘালয়ত ২০০খন চুপাৰিৰ ট্রাক প্রৱেশ কৰাৰ বিস্তৃত তথ্য ‘নিয়মীয়া বার্তা’ৰ হাতত আহি পৰিছে ৷
উল্লেখ্য যে কেইমাহমান পূর্বে গুৱাহাটী মহানগৰীত মহানগৰ আৰক্ষীয়ে জব্দ কৰিছিল ২৫খনকৈ বার্মিজ চুপাৰিভর্তি ট্রাক ৷ এই ট্রাককেইখনত আছিল কেইবা কোটি টকাৰ চোৰাং চুপাৰি ৷ ছিণ্ডিকেট লবীৰ হেঁচাত মহানগৰ আৰক্ষীয়ে অবৈধ চুপাৰি সৰবৰাহ কৰা ট্রাককেইখন মোকলাই দিব লৈছিল যদিও উচ্চতম ন্যায়ালয়ৰ হস্তক্ষেপত সেই অভিসন্ধি ব্যর্থ হয় ৷ তেতিয়াৰ পৰা অসমৰ মাজেৰে চলি থকা বার্মিজ চুপাৰিৰ চোৰাং ব্যৱসায় স্তিমিত হৈ পৰে ৷ কিন্তু শেহতীয়াকৈ ৰাজ্যত নাগৰিকত্ব সংশোধনী আইনবিৰোধী আন্দোলন তীব্রতৰ হৈ পৰাত এই চোৰাং ব্যৱসায়ৰ প্রতি ৰাইজৰ নজৰ কমি আহে ৷ ইয়াৰে পূর্ণ সুযোগ লৈ চুপাৰি মাফিয়া চক্রটো পুনৰ তৎপৰ হৈ উঠিছে ৷ বৰাক উপত্যকাৰ চোৰাং চুপাৰি ব্যৱসায়ৰ মূল কাণ্ডাৰী হিচাপে পৰিচিত অঞ্জন পাল, দীপাংকৰ দেৱ, জাকিৰ হুছেইনে কেইবাগৰাকীও আৰক্ষী–প্রশাসনৰ শীর্ষ বিষয়াৰ লগত বুজাবুজিলৈ আহে আৰু তৎকালীনভাৱে এই অবৈধ ব্যৱসায় আৰম্ভ কৰি দিয়ে ৷ তেওঁলোকৰ নেতৃত্বতে ম্যানমাৰৰ পৰা ৩,০০০ চুপাৰিভর্তি ট্রাক অসম অভিমুখে ৰাওনা হোৱাৰ খবৰ পোৱা গৈছে ৷
ছিণ্ডিকেট বাহিনীৰ পৰিকল্পনা অনুসৰি প্রতিনিশা তেওঁলোকে ১০০খন চুপাৰিভর্তি ট্রাক কাছাৰ–মেঘালয়–অসমৰ মাজেৰে বহিঃৰাজ্যলৈ প্রেৰণ কৰিব ৷ প্রতিখন ট্রাক সৰবৰাহৰ বিনিময়ত নির্দিষ্ট বিষয়া–আমোলাক ১ লাখকৈ টকা দিয়া হ’ব ৷ প্রথম ১০০খন ট্রাক কাছাৰৰ মাজেৰে পাৰ হ’বলৈ অনুমতি দিয়াৰ বিনিময়ত ইতিমধ্যে আদায় দিয়া হৈছে ১ কোটি টকা ৷ জনৈক ৰায় নামৰ এজন ব্যক্তিয়ে এখন ক’লা দুচকীয়া বাহনত এই ধন এক নির্দিষ্ট স্থানত আদায় দিয়া বুলি বিশ্বস্ত সূত্রই জানিবলৈ দিছে ৷ পৰৱর্তী সময়তো ‘ৰায়’ৰ জৰিয়তেই ধনৰ লেনদেন চলি থকাৰ খবৰ পোৱা গৈছে ৷ এইদৰে ছিণ্ডিকেট বাহিনীয়ে কাছাৰ সীমান্তৰে মেঘালয়লৈ অনা দুশখন ট্রাকৰ সবিশেষ তথ্যও ‘নিয়মীয়া বার্তা’ৰ হাতত আহি পৰিছে ৷ দুই শতাধিক ট্রাক বর্তমান মেঘালয়ৰ মাজেৰে উমৰাংছ’ হৈ নগাঁৱলৈ অহাৰ পথত আছে ৷ তাৰ মাজতে শেহতীয়াকৈ যোৰাবাটত আৰক্ষীয়ে ৭খন চুপাৰিভর্তি ট্রাক জব্দ কৰে ৷ ইয়াৰ পাছতে পোহৰলৈ আহে বৰাকৰ চুপাৰি ছিণ্ডিকেটৰ বহু বিস্ফোৰক কাহিনী ৷