নিয়মীয়া বাৰ্তা, ২৫ এপ্ৰিলঃ চন্দ্রত ষ্টেচন গঢ়াৰ প্রকল্পৰ বাবে আন্তর্জাতিক অংশীদাৰ বিচাৰি চীন আৰু ৰাছিয়াৰ মহাকাশ সংস্থাই আহ্বান জনাইছে৷ চীন ৰাষ্ট্রীয় মহাকাশ প্রশাসন (চি এন এছ এ) আৰু ৰ’ছ কছমছে যুটীয়াভাৱে বিবৃতিযোগে চন্দ্রত স্থাপন কৰিবলগীয়া কেন্দ্র প্রকল্পৰ বাবে আগ্রহী দেশ আন্তর্জাতিক সংগঠন আৰু অংশীদাৰ বিচাৰিছে৷ পূব চীনৰ গিয়াং শ্বু প্রদেশৰ নানজিঙত আন্তর্জাতিক চন্দ্র কেন্দ্রৰ কাৰণে চীন–ৰাছিয়াৰ এই আহ্বান তাৎপর্যপূর্ণ৷
চি এন এছ এৰ উপ–সঞ্চালক য়ু য়ানহুৱাই কয় যে আন আন্তর্জাতিক অংশীদাৰৰ সৈতে মিলিত হৈ চীন আৰু ৰাছিয়াই মহাকাশ কেন্দ্র স্থাপন কৰিব৷ চীন আৰু ৰাছিয়াৰ দ্বাৰা এই চন্দ্র কেন্দ্র ৰাষ্ট্রসংঘৰ মহাকাশ অভিযানৰ অংশীদাৰ হ’ব৷ চি এন এছ এ আৰু ৰ’ছ কছমছে মানৱ মহাকাশ বিজ্ঞান আৰু প্রযুক্তিৰ বিকাশ, আর্থ–সামাজিক প্রগতিৰ কাৰণে এই চন্দ্র কেন্দ্রৰ জৰিয়তে অভিযান চলাব৷ উল্লেখ্য যে ৰাষ্ট্রসংঘৰ কমিটীৰ দ্বাৰা আয়োজিত ৫৮সংখ্যক বৈজ্ঞানিক আৰু কাৰিকৰী উপ–কমিটীৰ অভিৱর্তনৰ সময়ত চি এন এছ এ আৰু ৰ’ছ কছমছে যুটীয়া বিবৃতিযোগে চন্দ্র কেন্দ্রক লৈ তেওঁলোকৰ এই আহ্বান প্রকাশ কৰে৷