নিয়মীয়া বাৰ্তা ১২ মেঃ আজি পুৱা ৬.৫৮ বজাত পৰলোকপ্ৰাপ্তি হোৱা অসমৰ প্ৰথিতযশা সাহিত্যিক, প্ৰবীণ সাংবাদিক, প্ৰাক্তন কটনিয়ান শ্ৰদ্ধেয় হোমেন বৰগোহাঞিদেৱক শেষ শ্ৰদ্ধাঞ্জলি জনোৱাৰ উদ্দেশ্যে আজি দিনৰ ১.৩০ বজাত কটন বিশ্ববিদ্যালয়ত এখনি শোক-সভা অনুষ্ঠিত হয়। সভাত অসমৰ সাহিত্য, সাংবাদিকতা তথা সামগ্ৰিকভাৱে বৃহত্তৰ অসমীয়া সমাজলৈ বৰগোহাঞিদেৱৰ অনবদ্য অৱদান সোঁৱৰণ কৰা হয় আৰু তেখেতৰ দেহাৱসানত সভাই অসমৰ বাবে এক অপূৰণীয় ক্ষতি বুলি গণ্য কৰে।
সভাত কটন বিশ্ববিদ্যালয়ৰ পঞ্জীয়ককে ধৰি কটন বিশ্ববিদ্যালয়ৰ শিক্ষক সংস্থাৰ সভাপতি, উপ-সভাপতি, গ্ৰন্থগাৰিকা আৰু কিছুসংখ্যক বিষয়ববীয়া আৰু কৰ্মচাৰী উপস্থিত থাকে। সভাই একমিনিট সময় মৌনতা অৱলম্বনেৰে তেখেতৰ বিদেহ আত্মাৰ শান্তিৰ অৰ্থে পৰমেশ্বৰ ওচৰত প্ৰাৰ্থনা জনায়।