নিয়মীয়া বাৰ্তা, ২৩ মেঃ বংগোপ সাগৰত সৃষ্ট সামুদ্রিক ধুমুহাই অতি ভয়াৱহ ৰূপত ওড়িশা আৰু পশ্চিমবংগত খুন্দিয়াব বুলি সতর্কবাণী জাৰি কৰিছে ভাৰতীয় বতৰ বিজ্ঞান বিভাগ (আইএমডি)–এ৷ বিভাগে প্রকাশ কৰা মতে, ২৬ মে’ৰ সন্ধিয়া অতি তীব্র বেগেৰে ঘূর্ণি ‘যশ’ ওড়িশা আৰু পশ্চিমবংগ অতিক্রম কৰি বাংলাদেশলৈ ধাৱমান হ’ব৷ ভয়াৱহ সামুদ্রিক ধুমুহাৰ ক্ষতিৰ সম্ভাৱনাৰ প্রতি লক্ষ্য ৰাখি ইতিমধ্যে দুয়োখন ৰাজ্যত হাই এলার্ট ঘোষণা কৰা হৈছে৷ সম্ভাব্য পৰিস্থিতিৰ মোকাবিলা কৰিবলৈ এন ডি আৰ এফকে ধৰি বায়ু–স্থলসেনাক সাজু কৰি ৰখা হৈছে৷
বতৰ বিজ্ঞান বিভাগৰ তথ্য মতে ২৩ মে’ৰ পুৱা সামুদ্রিক ঘূর্ণিৰ উদ্ভৱ হৈ লাহে লাহে ই তীব্র ৰূপ ল’ব৷ ২৪ মে’ত ই উত্তৰ–পশ্চিম দিশে ধাৱমান হৈ অতি দ্রুতবেগেৰে ২৪ ঘণ্টাৰ ভিতৰত ওড়িশা আৰু পশ্চিমবংগৰ উপকূলীয় অঞ্চলত খুন্দা মাৰিব৷ পাছলৈ ২৬ মে’ৰ সন্ধিয়া ই বাংলাদেশলৈ ধাৱমান হ’ব৷ উল্লেখ্য যে কিছুদিন পূর্বে সামুদ্রিক ধুমুহা টাউটিয়ে মহাৰাষ্ট্র, গুজৰাট, কেৰালা, গোৱা, কর্ণাটক আদি ৰাজ্যত সংহাৰী ৰূপ লৈছিল৷