নিয়মীয়া বাৰ্তা ১৮ আগষ্টঃ বিশ্ব–বিশ্রুত গায়ক তথা গীতি–সাহিত্যৰ প্রথমগৰাকী নোবেল বঁটা বিজয়ী ব’ব ডিলানৰ বিৰুদ্ধে উত্থাপিত যৌন আতিশয্যৰ অভিযোগ অস্বীকাৰ কৰিছে গায়কগৰাকীয়ে৷ ডিলানৰ বিৰুদ্ধে এগৰাকী মহিলাই যৌন আতিশয্য চলোৱাৰ অভিযোগ আনিছে৷ অভিযোগ অনুসৰি ১৯৬৫ চনত বাৰ বছৰ বয়সতে মহিলাগৰাকীক গায়ক তথা গীতিকাৰ ডিলানে যৌন আতিশয্য চলাইছিল৷ মহিলাগৰাকীয়ে তৰা গোচৰত উল্লেখ কৰা হৈছে যে ব’ব ডিলানৰ নিউয়র্কস্থিত ছেল্ছি হোটেলৰ এপার্টমেণ্টত ১৯৬৫ চনত এলক’হল আৰু ড্রাগ্ছ প্রদান কৰি মহিলাগৰাকীক কেইবাবাৰো যৌন আতিশয্য চলোৱা হৈছিল৷
আনকি মহিলাগৰাকীয়ে এই কথা সদৰী কৰিলে তেওঁক আক্রমণ কৰাৰ ভাবুকি দিছিল বুলিও অভিযোগত উল্লেখ কৰা হৈছে৷ ব’ব ডিলানৰ মুখপাত্রই সংবাদ সংস্থা বি বি চিক জনোৱা অনুসৰি বর্তমান ৬৮ বয়সৰ মহিলাগৰাকীয়ে অনা অভিযোগ সম্পূর্ণ মিছা৷ নোবেল বঁটা বিজয়ী ব’ব ডিলানৰ বর্তমান বয়স হৈছে ৮০ বছৰ৷ অভিযোগকাৰী মহিলাগৰাকীয়ে বাস কৰে আমেৰিকাৰ কানেকটিকাট প্রদেশত৷ মহিলাগৰাকীৰ সম্পূর্ণ পৰিচয় এতিয়াও সদৰী হোৱা নাই যদিও সংবাদ মাধ্যমত জেচি নামেৰে বিভিন্ন বক্তব্য প্রদান কৰি আছে৷ লক্ষণীয়ভাৱে ব’ব ডিলানৰ বাবে কিশোৰী অৱস্থাতে মহিলাগৰাকীয়ে মানসিক অস্থিৰতাত ভুগিবলগীয়া হৈছিল বুলিও উল্লেখ কৰা হৈছিল৷ চাইল্ডছ ভিক্টিম এক্টৰ অধীনত নিউয়র্কৰ শীর্ষ আদালতত শুকুৰবাৰে মহিলাগৰাকীয়ে ব’ব ডিলানৰ বিৰুদ্ধে গোচৰ ৰুজু কৰিছে৷ গায়কগৰাকীৰ বিৰুদ্ধে অভিযোগ উত্থাপন হোৱাৰ লগে লগে আমেৰিকাৰ সংবাদ মাধ্যমত সৃষ্টি হৈছে খলকনি৷