নিয়মীয়া বাৰ্তা ২১ ছেপ্টেম্বৰঃ ভাৰতীয় টি–২০ দলৰ নেতৃত্ব এৰিব বুলি ঘোষণা কৰাৰ তিনি দিন পিছতে ৰয়েল চেলেঞ্জার্ছ বাংগালুৰুৰ নেতৃত্ব ত্যাগৰ সিদ্ধান্ত লৈছে বিৰাট কোহলিয়ে৷ বি চি চি আইৰ ঐশ্বর্যশালী টি–২০ লীগ আই পি এলৰ দ্বিতীয় লেগৰ প্রথমখন মেচত খেলপথাৰত নমাৰ প্রায় ২৪ ঘণ্টা পূর্বে তাৰকা ক্রিকেটাৰগৰাকীয়ে এই গুৰুত্বপূর্ণ সিদ্ধান্তৰ কথা ঘোষণা কৰে৷ কামৰ বোজাৰ পৰা মুক্তি পাবলৈ কোহলিয়ে চলিত আই পি এলৰ পিছতে আৰ চি বিৰ নেতৃত্ব ত্যাগ কৰিব৷
যোৱানিশা আৰ চি বিয়ে টুইটাৰত প্রকাশ কৰা এক ভিডিঅ’ত অধিনায়ক কোহলিয়ে কয় যে এইবাৰ তেওঁ অধিনায়কৰ ৰূপত অন্তিমখন আই পি এল খেলিব৷ অৱশ্যে খেলুৱৈ হিচাপে কেৰিয়াৰৰ অন্তলৈ আৰ চি বিৰ হৈ খেলি থাকিব বুলিও তৰকাগৰাকীয়ে স্পষ্ট কৰে৷ দীর্ঘদিন ধৰি লাভ কৰি অহা সহায়–সহযোগিতা আৰু মৰম–চেনেহৰ বাবে তেওঁ আৰ চি বিৰ অনুৰাগীসকলক ধন্যবাদ জ্ঞাপন কৰে৷
‘দলীয় মেনেজমেণ্ট আৰু সতীর্থসকলৰ সৈতে আলোচনাৰ অন্তত আৰ চি বিৰ নেতৃত্ব ত্যাগৰ সিদ্ধান্ত লৈছোঁ৷ অত্যধিক কামৰ বোজাৰ পৰা মুক্তি পাবলৈ শেহতীয়াকৈ ভাৰতীয় টি–২০ দলৰ নেতৃত্ব এৰাৰ পিছৰে পৰা মই আৰ চি বিৰ নেতৃত্ব ত্যাগৰ কথা চিন্তা চর্চা কৰি আছিলোঁ৷ মই মেনেজমেণ্টক স্পষ্ট কৰি দিছোঁ যে আৰ চি বিক বাদ দি মই আন কোনো দলত যোগ দিয়াৰ কথা চিন্তা কৰা নাই৷ এগৰাকী খেলুৱৈ হিচাপে কেৰিয়াৰৰ শেষলৈ মই আৰ চি বিৰ হৈ খেলি থাকিম৷’ কোহলিয়ে এইদৰে কয়৷
উল্লেখ্য যে ১৯ বছৰ অনূর্ধ্ব বিশ্বকাপৰ লগতে ঘৰুৱা ক্রিকেটত দাঙি ধৰা চমকপ্রদ প্রদর্শনত আকৃষ্ট হৈ আৰ চি বিয়ে কোহলিক ২০০৮ চনত দলত অন্তর্ভুক্ত কৰিছিল৷ ২০১৩ত তেওঁক দলটোৱে নেতৃত্বৰ গুৰুদায়িত্ব অর্পণ কৰে৷ অৱশ্যে কোহলিৰ নেতৃত্বত আৰ চি বিয়ে আই পি এলৰ খিতাপ জয় কৰিব পৰা নাই৷ মন কৰিবলগীয়া যে আৰ চি বিৰ হৈ অধিনায়ক কোহলিয়ে আই পি এলত ২০০ সংখ্যক মেচ খেলে৷ ৫টা শতকসহ তেওঁ এই পর্যন্ত আই পি এলত ৬,০৭৬ ৰান সংগ্রহ কৰিবলৈ সক্ষম হৈছে৷
তাৰকাগৰাকীয়ে এতিয়ালৈকে ১৩২খন মেচত আৰ চি বিক নেতৃত্ব দিছে আৰু ইয়াৰে ৬০খনত জয়ৰ সোৱাদ লাভ কৰিছে৷ বিগত দুবছৰ ধৰি টেষ্টত শতক অর্জন কৰিব নোৱৰা কোহলিয়ে ক্রিকেটৰ দীঘলীয়া সংস্কৰণত অধিক মনোনিৱেশ কৰিবলৈ ভাৰতীয় টি–২০ দলৰ লগতে আৰ চি বিৰ নেতৃত্ব ত্যাগৰ সিদ্ধান্ত লৈছে৷