নিয়মীয়া বাৰ্তা, ৮ ডিচেম্বৰঃ ক’ভিড–১৯ৰ নতুন প্রকৰণ অমিক্রনৰ প্রাদুর্ভাৱৰ বাবে এসপ্তাহলৈ পিছুওৱা ভাৰত–দক্ষিণ আফ্রিকাৰ সূচী আজি নতুনকৈ প্রকাশ কৰা হৈছে৷ এই অনুসৰি দুয়োটা দলে অহা ২৬ ডিচেম্বৰত চেঞ্চুৰিয়নত শৃংখলাৰ প্রথম টেষ্ট খেলিব৷ বক্সিং ডে’ টেষ্ট হিচাপে পৰিচিত এই মেচখনৰ পিছতে ভাৰত আৰু দক্ষিণ আফ্রিকাই জোহান্সবার্গত ৩–৭ জানুৱাৰীত দ্বিতীয় আৰু কেপটাউনত ১১–১৫ জানুৱাৰীত তৃতীয় টেষ্টত অৱতীর্ণ হ’ব৷ ইয়াৰ পিছতে দল দুটা তিনিখন মেচৰ এদিনীয়া শৃংখলাত মুখামুখি হ’ব৷ পার্লত ১৯ আৰু ২১ জানুৱাৰীত ক্রমে প্রথম আৰু দ্বিতীয় আৰু কেপটাউনত ২৩ জানুৱাৰীত তৃতীয় এদিনীয়া অনুষ্ঠিত হ’ব৷
উল্লেখ্য যে ভাৰত আৰু দক্ষিণ আফ্রিকাৰ মাজত টেষ্ট শৃংখলা ১৭ ডিচেম্বৰৰ পৰা আৰম্ভ হোৱাৰ কথা আছিল যদিও মহামাৰী ক’ভিড–১৯এ দক্ষিণ আফ্রিকাত শেহতীয়াকৈ সৃষ্টি কৰা ভয়াৱহতাৰ প্রতি লক্ষ্য ৰাখি বি চি চি আয়ে শৃংখলাটো ২৬ ডিচেম্বৰলৈ পিছুৱাই দিছে৷