নিয়মীয়া বাৰ্তা, ১২ ডিচেম্বৰঃ তিনিচুকীয়া জিলাৰ মাৰ্ঘেৰিটাৰ মহকুমাৰ অন্যতম সাংস্কৃতিক সংস্থা প্ৰতিধ্বনি সাংস্কৃতিক মঞ্চৰ আগন্তুক ২০২১-২৩ বৰ্ষৰ বাবে নতুন সমিতি গঠন কৰা হয়। আজি সন্ধিয়া মাৰ্ঘেৰিটাৰ ইণ্ডিয়া ক্লাবত অনুষ্ঠিত সাধাৰণ সভাই ডঃ সনথ দত্তক সভাপতি, সাধাৰণ সম্পাদক বিনয় বৰুৱাক লৈ আগন্তুক দুটা বৰ্ষৰ বাবে এখন পঁচিশজনীয়া শক্তিশালী সমিতি নিৰ্বাচন কৰে। ডাঃ সনথ দত্তৰ পৌৰহিত্যত অনুষ্ঠিত হোৱা সাধাৰণ সভাত অঞ্চলটোৰ কেইবাগৰাকীও গণ্যমান্য ব্যক্তিৰ লগতে প্ৰায় চল্লিছগৰাকী সদস্য-সদস্যা উপস্থিত আছিল। সভাত মঞ্চৰ প্ৰাক্তন সাধাৰণ সম্পাদক শিৱানী ফুকনে উদ্দেশ্য বাখ্যা কৰাৰ লগতে গত কাৰ্যকালৰ প্ৰতিবেদন পাঠ কৰে। সমজুৱা একাষাৰত ডঃ ৰুণজুন শইকীয়া, পার্থ জ্যোতি বৰুৱা, মানস প্ৰতিম গগৈ ইত্যাদিয়ে বক্তব্য ৰাখি নৱগঠিত সমিতিখনলৈ শুভেচ্ছা জ্ঞাপন কৰে।
উল্লেখ যে বৃহত্তৰ মাৰ্ঘেৰিটা অঞ্চলটোত প্ৰতিধ্বনি সাংস্কৃতিক মঞ্চই কেইবাটাও সুন্দৰ সাংস্কৃতিক সামাজিক অনুষ্ঠান অনুষ্ঠিত কৰি আহিছে। আজিৰ সভাত কণ্ঠশিল্পী তাৰা প্ৰসাদ দিহিঙীয়া, নিৰ্মালি কলিতা মাহাও, হামিদুৰ ৰহামানে এটিকৈ গীত পৰিৱেশন কৰে। অন্যহাতে ২০২১-২৩ বৰ্ষত প্ৰতিধ্বনি সাংস্কৃতিক মঞ্চৰ উদ্যোগত বিভিন্ন অনুষ্ঠান অনুষ্ঠিত কৰাৰ ক্ষেত্ৰত সকলোৰে সহায় সহযোগিতা কামনা কৰিছে মঞ্চৰ সম্বয়ৰক্ষি ধ্ৰুবজ্যতি বৰুৱাই।
input: মানস প্ৰতিম গগৈ, মাৰ্ঘেৰিটা