নিয়মীয়া বাৰ্তা ২২ মাৰ্চঃ মেখেলা–চাদৰক অনন্য ৰূপ প্রদান কৰি প্রখ্যাত হোৱা ডিজাইনাৰ সংযুক্তা দত্তই এইবাৰ লেকমী ফেশ্বন উইকত তেওঁৰ নতুন সংগ্রহ ‘শুকুলা’ দেওবাৰে প্রদর্শন কৰে৷ ফেশ্বন তথা বলীউড সুন্দৰী লাৰা দত্তক সংযুক্তাৰ নতুন সংগ্রহৰ পৰিধানেৰে ৰেম্পত অতি মোহময়ী আৰু আকর্ষণীয় দেখা যায়৷ এই সম্পর্কত সংযুক্তা দত্তই কয় যে লেকমী ফেশ্বন উইকত তেওঁৰ নতুন সংগ্রহখিনি প্রদর্শন কৰি তেওঁ অতিকৈ উৎসাহিত আৰু আনন্দিত হৈছে৷
সকলো প্রতিষ্ঠিত তথা প্রখ্যাত ডিজাইনাৰসকলৰ বাবে তেওঁলোকৰ সৃষ্টিৰাজি প্রদর্শন কৰাৰ বাবে লেকমী ফেশ্বন উইক এক উত্তম প্লেটফর্ম৷ তেওঁলোকৰ মাজত মোৰ সংগ্রহখিনি প্রদর্শন কৰিব পৰাটো মোৰ বাবে যেনেদৰে গৌৰৱৰ কাৰণ, ঠিক তেনেদৰে এক প্রত্যাহ্বানো৷ লাৰা দত্তৰ সৈতে কাম কৰাটো এক আনন্দদায়ক অভিজ্ঞতা বুলি উল্লেখ কৰি তেওঁ কয়– ‘মোৰ নতুন সংগ্রহ ‘শুকুলা’ অর্থাৎ উজ্জ্বল শুধ বগা যেন শান্তি আৰু পৱিত্রতাৰ এক বাংময় প্রকাশ৷’
ইপিনে, লাৰা দত্তই নিজৰ অনুভৱ ব্যক্ত কৰি কয়– ‘এই কার্যসূচীত অংশগ্রহণ কৰাটো সঁচাকৈ অতি আনন্দদায়ক আৰু সংযুক্তাৰ ৰঙৰ খেল আৰু ধাৰণা বিৰল তথা অনন্য৷’ সংযুক্তাৰ এই সংগ্রহ ‘শুকুলা’ যেন সূতাৰে বোৱা এক কবিতা, য’ত অলেখ কাহিনী গাঁঠি থোৱা আছে৷ সেয়া যেন পৱিত্র, শান্ত যদিও উজ্জ্বল এক প্রকাশ৷