নিয়মীয়া বাৰ্তা, ২৩ ডিচেম্বৰঃ ৰাজ্যৰ সাংস্কৃতিক ক্ষেত্রলৈ আগবঢ়োৱা বিশিষ্ট অৱদানৰ স্বীকৃতিস্বৰূপে লোককৃষ্টিৰ সাধক খগেন গগৈক প্রদান কৰা হ’ব গোৱালপাৰীয়া লোকগীতৰ সম্রাজ্ঞী পদ্মশ্রী প্রতিমা বৰুৱা পাণ্ডে স্মাৰক বঁটা৷ সদৌ অসম ছাত্র সন্থা (আছু)–এ প্রতিবছৰে প্রদান কৰি আহিছে এই স্মাৰক বঁটা৷ অহা ২৭ ডিচেম্বৰত গুৱাহাটীৰ চানমাৰিৰ শ্বহীদ উদ্যানত থকা প্রতিমা বৰুৱা পাণ্ডেৰ প্রতিমূর্তিস্থলীত দিনৰ ১০.৩০ বজাত গগৈক এই বঁটা প্রদান কৰিব৷ এক বিবৃতিৰ জৰিয়তে এই কথা সদৰী কৰিছে আছুৰ সভাপতি দীপাংক কুমাৰ নাথ আৰু সাধাৰণ সম্পাদক শংকৰজ্যোতি বৰুৱাই৷ অহা ২৭ ডিচেম্বৰত অনুষ্ঠিত হ’বলগীয়া বঁটা প্রদান অনুষ্ঠানত শুভাকাংক্ষীৰ উপস্থিতি কামনা কৰিছে আয়োজক আছুৱে৷