এইবাৰ ৰাজহুৱা হ’ব গৌৰৱৰ পাকিস্তান কানেকচনৰ তথ্য

জুবিন গার্গৰ মৃত্যুৰ তদন্তৰ ন্যায় প্রক্রিয়া আৰম্ভ হোৱাৰ পাছতে কংগ্রেছ নেতা গৌৰৱ গগৈৰ পাকিস্তান সংযোগৰ তথ্য ৰাজহুৱা কৰা হ’ব৷ এই কথা ঘোষণা কৰে মুখ্যমন্ত্রী ড০ হিমন্ত বিশ্ব শর্মাই৷

মুখ্যমন্ত্রী ড০ শর্মাই কয়– গৌৰৱ গগৈৰ পাকিস্তান সংযোগ সন্দর্ভত ইতিমধ্যে এছআইটিয়ে দাখিল কৰা প্রতিবেদন অনুসন্ধানৰ বাবে কেন্দ্রীয় সংস্থালৈ প্রেৰণ কৰা হ’ব৷ জুবিন গার্গৰ মৃত্যুৰ তদন্তৰ আইনী প্রক্রিয়া আৰম্ভ হোৱাৰ পাছতে এই মাহৰ শেষভাগত অথবা জানুৱাৰীৰ প্রথম ভাগত এছআইটিয়ে দাখিল কৰা প্রতিবেদনৰ কিছু তথ্য ৰাজহুৱা কৰা হ’ব৷

অৱশ্যে এছআইটিৰ প্রতিবেদন বিস্তৃত অনুসন্ধান তথা তদন্তৰ বাবে কেন্দ্রীয় সংস্থালৈ প্রেৰণ কৰা হ’ব৷ মুখ্যমন্ত্রীয়ে কয়– গৌৰৱ গগৈৰ পাকিস্তান সংযোগৰ এই ঘটনাৰ সৈতে বহু বিষয় জড়িত হৈ আছে৷ এই ঘটনাৰ তদন্তৰ বাবে গঠন কৰা এছআইটিয়ে সকলো দিশ তদন্তত সামৰি ল’ব পৰা নাই৷

কিন্তু এছআইটিয়ে এই তদন্তকালত যি তথ্য সংগ্রহ কৰিছে, সেই তথ্য অভিযোগকাৰীৰ বিৰুদ্ধে যথেষ্ট৷ উল্লেখ্য যে ২০২৫ চনৰ ১৭ ফেব্রুৱাৰীত ৰাজ্যিক কেবিনেটে পাকিস্তানৰ নাগৰিক আলী তৌকিৰ শ্বেখ আৰু তেওঁৰ সহযোগীসকলৰ ভাৰতবিৰোধী কার্যকলাপৰ তদন্তৰ বাবে এছআইটি গঠনৰ সিদ্ধান্ত লৈছিল৷

এছআইটিয়ে চলোৱা এই তদন্তত আলী তৌকিৰ শ্বেখৰ ভাৰতবিৰোধী কার্যকলাপৰ সৈতে এগৰাকী ব্রিটিছ নাগৰিক জড়িত থকাৰ তথ্য লাভ কৰিছিল, যিগৰাকী ব্রিটিছ নাগৰিক হ’ল গৌৰৱ গগৈৰ পত্নী এলিজাবেথ৷ মুখ্যতঃ এই তথ্যৰ আধাৰত এছআইটিয়ে তদন্ত আৰম্ভ কৰি যোৱা ছেপ্টেম্বৰ মাহত মুখ্যমন্ত্রীক প্রতিবেদন দাখিল কৰিছিল৷

মুখ্যমন্ত্রী ড০ শর্মাই তদন্ত ৰাজহুৱা কৰা সন্দর্ভত স্পষ্ট কৰে যে এছআইটিৰ প্রতিবেদনৰ সকলো দিশ কেন্দ্রীয় সংস্থাৰ দ্বাৰাহে পৰীক্ষা সম্ভৱ হ’ব৷

ডিজিটেল ডেস্ক, ১৩ ডিচেম্বৰ