ডিজিটেল ডেস্ক, ১০ ফেব্ৰুৱাৰী : অসম ৰাজ্যিক বিদ্যালয় শিক্ষা পৰিষদ, চমুকৈ এছেবৰ অধীনত আজিৰ পৰা ৰাজ্যজুৰি অনুষ্ঠিত হ’ল হাইস্কুল শিক্ষান্ত পৰীক্ষা৷ প্রায় এমাহজোৰা কার্যসূচীৰে ৰাজ্যৰ ১,০৪৬টা পৰীক্ষা কেন্দ্রত এইবাৰ মুঠ ৪,৩৮,৬৬৫গৰাকী পৰীক্ষার্থীয়ে হাইস্কুল শিক্ষান্ত পৰীক্ষাত অৱতীর্ণ হ’ব৷
আজি পুৱা ৯ বজাৰ পৰা আৰম্ভ হোৱা থিয়ৰী পৰীক্ষা অহা ২৭ ফেব্রুৱাৰীলৈ চলিব৷ বিগত বর্ষৰ তুলনাত এইবাৰ পৰীক্ষার্থী প্রায় ১৮ হাজাৰৰো অধিক বৃদ্ধি পাইছে ৷ যাৰ বাবে পৰীক্ষা কেন্দ্রৰ সংখ্যাও বৃদ্ধি কৰা হৈছে৷ পূর্বৰ তুলনাত এইবাৰ ১১৭টা কেন্দ্র বৃদ্ধি কৰা হৈছে৷ আনহাতে, পৰীক্ষা ব্যৱস্থাপনাৰ সমান্তৰালভাৱে উত্তৰবহী পৰীক্ষণৰ বাবেও সকলো সু–ব্যৱস্থা কৰা হৈছে৷ ৪৫টা মণ্ডলত উত্তৰবহীসমূহ মূল্যায়নৰ ব্যৱস্থা কৰা হৈছে৷
প্রশ্ণকাকতসমূহ এইবাৰ একাদিক্রমে ইংৰাজী, অসমীয়া, বালাং, বড়ো আৰু হিন্দী ভাষাত ছপা কৰা হৈছে৷ পৰীক্ষাৰ সময়ছোৱাত যাতে কোনোধৰণৰ অপ্রীতিকৰ পৰিস্থিতিৰ সৃষ্টি নহয়, তাৰ প্রতিও বিশেষ নজৰ ৰখা হৈছে। হাইস্কুল শিক্ষান্ত পৰীক্ষাত অৱতীর্ণ হ’ব লগা প্রতিগৰাকী পৰীক্ষার্থীক শুভেচ্ছা জনাইছে শিক্ষামন্ত্রী ডাঃ ৰণোজ পেগুৱে৷
আনহাতে, কাইলৈ পৰা আৰম্ভ হ’ব উচ্চতৰ মাধ্যমিকৰ চূড়ান্ত পৰীক্ষা। উচ্চতৰ মাধ্যমিকৰ চূড়ান্ত পৰীক্ষা অনুষ্ঠিত হ’ব ৮২১টা কেন্দ্ৰত। এই বৰ্ষত উচ্চতৰ মাধ্যমিকৰ চূড়ান্ত পৰীক্ষাত মুঠ ৩,৩০,৩৪৪গৰাকী পৰীক্ষাৰ্থী অৱতীৰ্ণ হ’ব।