- নিৰ্দ্ধাৰিত সময়ত মথাউৰিৰ কাম সমাপ্ত কৰিবলৈ বিভাগীয় অভিযন্তা-ঠিকাদাৰক নিৰ্দেশ মন্ত্ৰী হাজৰীকাৰ
নিয়মীয়া বাৰ্তা, ২৩মাৰ্চ: অসম চৰকাৰৰ জলসম্পদ বিভাগৰ মন্ত্ৰী পীযুষ হাজৰীকাই আজি তামুলপুৰ সমষ্টিৰ অন্তৰ্গত দুটা অঞ্চল ভ্ৰমণ কৰি পাগলাদিয়া আৰু শুক্লাই নদীৰ মথাউৰি মেৰামতিৰ কামৰ অগ্ৰগতিৰ বুজ লয় । প্ৰথমতে মন্ত্ৰীগৰাকীয়ে হাঁহকটা অঞ্চলত নিৰ্মীয়মান পাগলাদিয়া নদীৰ মথাউৰিৰ কামৰ অগ্ৰগতিৰ বুজ লয় । বিগত বাৰিষাত অঞ্চলটোত মথাউৰি চিগি কাষৰীয়া অঞ্চলত বানৰ সৃষ্টি কৰিছিল । বিভাগীয়ভাৱে প্ৰায় ১৬ কোটি টকা ব্যয়েৰে মথাউৰিৰ চিগা অংশ মেৰামতি কৰাৰ লগতে মথাউৰি ওখ আৰু শক্তিশালী কৰাৰ কাম চলি আছে । আজিৰ পৰিদৰ্শনকালত মন্ত্ৰীগৰাকীয়ে নিৰ্দ্ধাৰিত সময়ৰ ভিতৰত কাম সম্পূৰ্ণ কৰিবলৈ বিভাগীয় অভিযন্তা আৰু ঠিকাদাৰক নিৰ্দেশনা প্ৰদান কৰে ।
পাছত মন্ত্ৰী হাজৰীকাই ভোলাঝাৰ অঞ্চলত উপস্থিত হৈ অঞ্চলটোত নিৰ্মীয়মান শুক্লাই নদীৰ মথাউৰিৰ কামৰ অগ্ৰগতিৰ বুজ লয় । অঞ্চলটোত বিগত বানত চিঙা মথাউৰি মেৰামতি আৰু ওখ কৰাৰ বাবে জলসম্পদ বিভাগৰ পৰা প্ৰায় ৪.৯ কোটি টকাৰ আঁচনি গ্ৰহণ কৰি কাম কৰি থকা হৈছে ।
মন্ত্ৰীগৰাকীৰ সৈতে আজিৰ পৰিদৰ্শনকালত তামুলপুৰ সমষ্টিৰ বিধায়ক জলেন দৈমাৰী আৰু কমলপুৰৰ বিধায়ক দিগন্ত কলিতাৰ লগতে বিভাগীয় মুখ্য অভিযন্তা আৰু আন বিষয়াসকল উপস্থিত আছিল ।
Visited Tamulpur today to inspect the ongoing works of embankment to prevent the erosion which was earlier caused by Pagladiya river. The embankment is being constructed at a cost of ₹16crs. I directed WR officials to expedite the construction & assure best quality. pic.twitter.com/ZWLXbzcHRP
— Pijush Hazarika (@Pijush_hazarika) March 23, 2023