বার্তা ব্যুৰ’, ১১ জুনঃ তেজপুৰৰ লিচুৰ সোৱাদ ল’লে মুখ্যমন্ত্রী ড০ হিমন্ত বিশ্ব শর্মাই৷ বিদেশৰ বজাৰত তেজপুৰৰ লিচুৱে সমাদৰ লাভ কৰাৰ সময়তে সুদূৰ লণ্ডনলৈ তেজপুৰৰ লিচু ৰপ্তানিৰ ফ্লেগ অফ কৰে মুখ্যমন্ত্রীয়ে৷ ২০১৫ চনতে জি আই টেগ লাভ কৰিবলৈ সক্ষম হোৱা তেজপুৰৰ মুম্বায়া, ইলাচী, বাদামী, দেশী, বিলাতী ইত্যাদি বিভিন্ন প্রজাতিৰ লিচুৱে ইতিমধ্যে দেশে–বিদেশে সমাদৰ লাভ কৰিবলৈ সক্ষম হৈছে৷ শ্বাহি প্রজাতিৰ ৬০০ কেজি আৰু বুম্বায়া প্রজাতিৰ ১০০ কেজি অর্থাৎ ২৭০০০ টা লিচু প্রেৰণ কৰা হয়৷ ৰপ্তানিৰ এই সমগ্র প্রক্রিয়াটোৰ সৈতে জড়িত হৈ আছে কে আই ই জি এ এগজিম্চ নামৰ প্রতিষ্ঠানটোৰ লগতে নাবার্ড, এপিডা, এপার্ট, অসম কৃষি বিশ্ববিদ্যালয়, বিশ্বনাথ কৃষি মহাবিদ্যালয়, কৃষি বিজ্ঞান কেন্দ্র তেজপুৰ, তেজপুৰ বিশ্ববিদ্যালয়, অসম চৰকাৰৰ কৃষি বিভাগ আৰু শোণিতপুৰ জিলা প্রশাসন৷ প্রণিধানযোগ্য যে, ১৯২৪ চনত তদানীন্তন তেজপুৰ পৌৰপতি সাহিত্যকাণ্ডাৰী পদ্মনাথ গোহাঞি বৰুৱাই চহৰখনত ৰোপণ কৰিছিল কেইটামান উন্নতজাতৰ বিশেষ লিচু পুলি৷ সেই লিচুৱে এতিয়া তেজপুৰৰ বাবে হৈ পৰিল গৌৰৱৰ কাৰণ৷ তেজপুৰ পৰোৱা, হাৰিগাঁও, কলিবাৰী, পল্টন পুখুৰীকে ধৰি বিভিন্ন স্থানত ৰঙীন সুমিষ্ট লিচুৰে ভৰি পৰে এই সময়ছোৱাত৷ কিন্তু বাণিজ্যিক ব্যৱস্থা আৰু পৰিকল্পিতভাৱে লিচু খেতি কৰাৰ বাবে সহযোগিতাৰ অভাৱৰ বাবেই তেজপুৰৰ লিচুৱে বাণিজ্যিকভাৱে সফল হ’ব পৰা নাছিল৷ শেহতীয়াকৈ এশৰো অধিক খেতিয়ক আগবাঢ়ি আহিছে লিচু খেতি কৰিবলৈ৷ এনে একাংশ খেতিয়কক লৈ গঠন কৰা হৈছে এক অগ্নিগড় ফামার্চ প্রডিডচাৰ কোম্পানী৷