মহিলা প্রিমিয়াৰ লীগত আনছ’ল্ড অসম কন্যা উমা চেত্রী

অসমবাসীৰ বাবে দুঃখবৰ৷ মহিলা প্রিমিয়াৰ লীগৰ মেগা নিলামত আনছ’ল্ড অসম কন্যা উমা চেত্রী৷ সদ্যসমাপ্ত আইচিচি মহিলা এদিনীয়া বিশ্বকাপৰ চেম্পিয়ন ভাৰতীয় দলটোৰ সদস্য উমা চেত্রীক নতুন দিল্লীত অনুষ্ঠিত ২০২৬ৰ মহিলা প্রিমিয়াৰ লীগৰ খেলুৱৈৰ মেগা নিলামত কোনো এটা দলে ক্রয় কৰাৰ পৰা বিৰত থাকে৷ বেছ প্রাইজ ৫০ লাখ টকা ধার্য কৰা উমা চেত্রীৰ নাম নিলামত উত্থাপন কৰা হয় যদিও কোনো এটা ফ্রেনচাইজীয়ে অসম কন্যাগৰাকীক ক্রয় কৰাৰ আগ্রহ প্রকাশ নকৰিলে৷

উল্লেখ্য যে ২০২৪ চনত ইউ পি ৱাৰিয়র্জৰ হৈ খেলা উমা চেত্রীয়ে এতিয়ালৈকে মহিলা প্রিমিয়াৰ লীগত ৯খন মেচ খেলি মুঠ ৮০ ৰানহে কৰিছে৷

ইফালে, অষ্ট্রেলিয়াৰ মহিলা দলটোৰ উইকেটকীপাৰ বেটাৰ এলিছা হিলীও আনছ’ল্ড হয়৷  মেগা নিলামত প্রথমগৰাকী খেলুৱৈ হিচাপে নাম উচ্চাৰণ হোৱা হিলীৰ বেষ্ট প্রাইজ আছিল ৫০ লাখ টকা৷

২০২৩ চনত ৭০ লাখ টকাত ইউ পি ৱাৰিয়র্ছে ক্রয় কৰা হিলীক মেগা নিলামত ফ্রেনচাইজীয়ে ক্রয় কৰাৰ আগ্রহ প্রকাশ নকৰিলে৷

উল্লেখ্য যে মেগা নিলামত আটাইতকৈ দামী খেলুৱৈ হিচাপে বিবেচিত হয় দীপ্তি শর্মা৷ বেষ্ট প্রাইজ ৫০ লাখ টকা ধার্য কৰা দীপ্তিক ৩.২ কোটি টকাত ক্রয় কৰে ইউ পি ৱাৰিয়র্ছে৷

ডিজিটেল ডেস্ক, ২৮ নৱেম্বৰ