গুৱাহাটীত সদ্যসমাপ্ত দ্বিতীয় তথা অন্তিমখন টেষ্টত লজ্জাৰ পৰাজয়ৰ পিছত টীম ইণ্ডিয়াৰ মুখ্য প্রশিক্ষক গৌতম গম্ভীৰে কৈছিল যে ভাৰতীয় ক্রিকেট নিয়ন্ত্রণ ব’র্ডে তেওঁৰ ভাগ্য নির্ণয় কৰিব৷ প্রশিক্ষক গৌতম গম্ভীৰৰ এই মন্তব্যৰ পিছতে মুখ খুলিলে বিচিচিআয়ে৷
সংবাদ মাধ্যমক দিয়া এক সাক্ষাৎকাৰত ব’ৰ্ডৰ এজন আগশাৰীৰ বিষয়ববীয়াই কয় যে এই সময়ত আমি গৌতম গম্ভীৰক আঁতৰোৱাৰ কথা ভবা নাই৷ তেওঁ এটা নতুন দল গঢ়ি তুলিছে৷ ২০২৭ চনৰ বিশ্বকাপলৈ তেওঁৰ চুক্তি আছে৷
দক্ষিণ আফ্রিকাৰ বিপক্ষে শৃংখলা সমাপ্তিৰ পিছত ব’ডৰ বিষয়ববীয়াসকলে প্রশিক্ষক গৌতম গম্ভীৰ আৰু নির্বাচক মণ্ডলীক সাক্ষাৎ কৰিব৷ এই সাক্ষাতৰ সময়ত গম্ভীৰক ভাৰতীয় দলটোৰ ভৱিষ্যত সন্দর্ভত প্রশ্ণ উত্থাপন কৰাৰ পূর্ণ সম্ভাৱনা আছে৷
ইপিনে, ব’ৰ্ডৰ আন এজন বিষয়াই কয় যে ভাৰতীয় ক্রিকেট নিয়ন্ত্রণ ব’র্ডে খৰখেদাকৈ কোনো সিদ্ধান্ত লোৱাৰ পক্ষত নহয়৷ গম্ভীৰৰ ভৱিষ্যতৰ বিষয়ে এতিয়াই সিদ্ধান্ত লোৱাৰ কোনো কাৰণ নাই৷ ভাৰতীয় দলটোত বর্তমান পৰীক্ষা–নিৰীক্ষা চলি আছে৷
সন্মুখত টি–২০ আৰু এদিনীয়া বিশ্বকাপো আছে৷ গতিকে প্রশিক্ষক গম্ভীৰৰ সন্দর্ভত এতিয়াই পদক্ষেপ ল’লে দলটোৰ বাবে ক্ষতিকাৰক হোৱাৰ পূর্ণ সম্ভাৱনা আছে বুলি ব’ৰ্ডৰ বিষয়াগৰাকীয়ে ব্যক্ত কৰে৷ ভাৰতীয় দলটোক উচ্চ পর্যায়লৈ নিয়াৰ বাবে গম্ভীৰক আৰু কিছু সময় দিয়া হ’ব৷
অৱশ্যে গম্ভীৰৰ ক্ষেত্রত ব’ৰ্ডৰ বিষয়াসকল পূর্বতকৈ অলপ কঠোৰ হ’ব বুলি ইংগিত দিছে বিচিচিআইৰ বিষয়াগৰাকীয়ে৷
উল্লেখ্য যে গম্ভীৰৰ প্রশিক্ষণত ভাৰতীয় দলটোৱে গৃহভূমিত দুটাকৈ শৃংখলাত হোৱাইট ৱাশ্বৰ সন্মুখীন হৈছে৷ বিগত বছৰ নিউজিলেণ্ডৰ হাতত হোৱাইট ৱাশ্ব হোৱাৰ পাছত ভাৰতীয় দলটোৱে দক্ষিণ আফ্রিকাৰ বিৰুদ্ধে সদ্যসমাপ্ত দুখনীয়া টেষ্ট শৃংখলাটোতো হোৱাইট ৱাশ্বৰ সন্মুখীন হয়৷
ডিজিটেল ডেস্ক, ২৮ নৱেম্বৰ