বিহু বিনন্দীয়া আৰু ঝুমইৰ বিনন্দিনীৰ বিপুল সফলতাৰ পিছত এইবাৰ ৰাজ্যবাসীয়ে দেখিবলৈ পাব বাগৰুম্বা নৃত্যক বিশ্বত পৰিচয় কৰি দিয়াৰ এক প্রয়াস৷ উল্লেখ্য যে ১৭ জানুৱাৰীত সৰুসজাইৰ ভোগেশ্বৰ বৰুৱা ক্রীড়া প্রকল্পত প্রায় ১০ হাজাৰৰো অধিক শিল্পীয়ে এই বাগৰুম্বা নৃত্য প্রদর্শনেৰে সৃষ্টি কৰিব অভিলেখ৷
প্রধানমন্ত্রী নৰেন্দ্র মোদীৰ উপস্থিতিত অনুষ্ঠিত হ’ব লগা এই বাগৰুম্বা নৃত্য অনুষ্ঠান সুচাৰুৰূপে সম্পন্ন কৰাৰ লক্ষ্যৰে মুখ্যমন্ত্রী ড০ হিমন্ত বিশ্ব শর্মা আৰু সাংস্কৃতিক মন্ত্রী বিমল বড়া সৰুসজাইত তদাৰক কৰে৷
মুখ্যমন্ত্রীয়ে ষ্টেডিয়ামখন পৰিদর্শন কৰাৰ লগতে ইয়াৰ প্রস্তুতি সম্পর্কত বিষয়াসকলৰ সৈতে এক পর্যালোচনা বৈঠকত অংশগ্রহণ কৰে৷ বিহু বিনন্দীয়া আৰু ঝুমইৰ বিনন্দিনীৰ বাবে সকলো প্রস্তুতি সময়মতে আৰু সুচাৰুৰূপে সম্পন্ন কৰাৰ দিশত ব্যৱস্থা গ্রহণৰ বাবেও প্রয়োজনীয় নির্দেশনা বিষয়াসকলক প্রদান কৰে৷
উল্লেখ্য যে ১৭ জানুৱাৰীত অনুষ্ঠিত হ’বলগা বাগৰুম্বা নৃত্যৰ চূড়ান্ত প্রদর্শনৰ পূর্বেই অহা ৪, ৫ আৰু ৬ জানুৱাৰীত ওজা প্রশিক্ষকসকলক প্রশিক্ষণ প্রদান কৰা হ’ব৷ ইয়াৰ পিছত এটা ভিডিঅ’ ট্রেকৰ সহায়ত এই ওজা প্রশিক্ষকসকলে ৰাজ্যৰ ২৩খন জিলালৈ গৈ ৮, ৯ আৰু ১০ জানুৱাৰীত মূল অনুষ্ঠানত অংশগ্রহণ কৰিব লগা শিল্পীসকলক প্রশিক্ষণ প্রদান কৰিব৷
মন্ত্রী বিমল বড়াই প্রকাশ কৰা অনুসৰি উপযুক্ত প্রশিক্ষণ প্রদানৰ পিছত শিল্পীসকলক সৰুসজাই ষ্টেডিয়ামত চূড়ান্ত পর্যায়ত নৃত্য প্রদর্শনৰ বাবে ৰাজ্যৰ বিভিন্ন ঠাইৰ পৰা ১১ জানুৱাৰীত গুৱাহাটীলৈ অনা হ’ব৷ অহা ১২, ১৩, ১৪ আৰু ১৫ জানুৱাৰীত সৰুসজাই ষ্টেডিয়ামত শিল্পীসকলে চূড়ান্ত আখৰা কৰিব৷
১৬ জানুৱাৰীত চূড়ান্ত আখৰা সম্পন্ন হ’ব৷ খাম, চিম্ফু, চেৰজা আদি পৰম্পৰাগত বাদ্যযন্ত্রৰ তালে তালে বড়ো গাভৰুসকলে ১৭ জানুৱাৰীৰ সন্ধিয়া প্রধানমন্ত্রী নৰেন্দ্র মোদীৰ উপস্থিতিত ইতিহাস সৃষ্টি কৰিবলগীয়া সমূহীয়া বাগৰুম্বা নৃত্য প্রদর্শন কৰিব৷
ডিজিটেল ডেস্ক, ৩ জানুৱাৰী