নিয়মীয়া বাৰ্তা ১১ জুনঃ মহানগৰবাসীক কৃত্রিম বানৰ পৰা সকাহ দিয়াৰ লক্ষ্যৰে জি এম চি কর্তৃপক্ষই দিন–ৰাতি একাকাৰ কৰি নলা–নর্দমা নিষ্কাশনৰ কাম কৰি আছে৷ বিভাগীয় মন্ত্রী অশোক সিংঘালৰ নির্দেশত পৌৰ আয়ুক্তই নিতৌ কামৰ বুজ লোৱাৰ পিছত নলা–নর্দমা নিষ্কাশনত কামৰ দায়িত্ব লাভ কৰা ঠিকাদাৰে বিগত এমাহত মাত্র ২৫–৩০ শতাংশ কাম সম্পন্ন কৰা বুলি পোহৰলৈ আহে৷
পিছত কামৰ অগ্রগতিত অসন্তুষ্টি প্রকাশ কৰি কালি ৭১গৰাকী ঠিকাদাৰক কাৰণ দর্শোৱাৰ জাননী জাৰি কৰে৷ পৌৰ নিগমৰ জাননী পোৱাত ঠিকাদাৰসকলে উদ্বেগ প্রকাশ কৰি দিনে–নিশাই কাম কৰাৰ পিছতো জাননী প্রেৰণ কৰাত পৌৰ নিগমৰ বিভাগীয় অভিযন্তাৰ প্রতি তীব্র ক্ষোভ প্রকাশ কৰে৷
জি এম চিৰ নির্দেশ মতে আজি প্রায় ৩০গৰাকী ঠিকাদাৰে পৌৰ আয়ুক্তলৈ কামৰ অগ্রগতি সন্দর্ভত লিখিত প্রতিবেদন দাখিল কৰে৷ অৱশ্যে বাকী ৪০গৰাকী ঠিকাদাৰে আজিও প্রতিবেদন দাখিল কৰাৰ পৰা বিৰত আছে৷ উল্লেখ্য যে পৌৰ আয়ুক্তই কাৰণ দর্শোৱাৰ জাননী প্রেৰণ কৰি তিনি দিনৰ ভিতৰত প্রতিবেদন দাখিলৰ নির্দেশ দিছিল৷