নিয়মীয়া বাৰ্তা ১০ জুলাইঃ ব্যক্তিগত সহায়িকাক নৈশ যাপনৰ প্রস্তাৱ দি আৰক্ষীৰ জালত পৰিল বিতর্কিত ঠিকাদাৰ সঞ্জীৱ আগৰৱালা৷ কর্মচাৰীৰ ভৱিষ্যনিধিৰ ঠিকাদাৰ সঞ্জীৱ আগৰৱালাই ব্যক্তিগত সহায়িকাগৰাকীক অশ্লীল প্রস্তাৱ দি আহিছিল৷ এই প্রস্তাৱ প্রত্যাখান কৰাত ব্যক্তিগত সহায়িকাগৰাকীক বিভিন্ন ধৰণে মানসিক নির্যাতন চলাইছিল সঞ্জীৱ আগৰৱালাই৷ আগৰৱালাৰ মানসিক নির্যাতনৰ বলি হোৱা ব্যক্তিগত সহায়িকাগৰাকীয়ে উপায়হীন হৈ ভঙাগড় থানাত এজাহাৰ দাখিল কৰে৷
উক্ত এজাহাৰৰ ভিত্তিত আৰক্ষীয়ে ভাৰতীয় দণ্ডবিধিৰ ৩৫৪ (ডি)/২৯৪ আৰু আই পি এক্ট ৬৬ ধাৰাৰ অধীনত এটা গোচৰ ৰুজু কৰি ভঙাগড় আৰক্ষীয়ে শুকুৰবাৰে অভিযুক্ত সঞ্জীৱ আগৰৱালাক গ্রেপ্তাৰ কৰে৷ ঘটনা সন্দর্ভত আৰক্ষীয়ে অভিযুক্ত আগৰৱালাক মাৰাথন জেৰা অব্যাহত ৰাখিছে৷ উল্লেখ্য যে সঞ্জীৱ আগৰৱালাৰ মানসিক নির্যাতনৰ বলি হৈ পূর্বতেও দুগৰাকী ব্যক্তিগত সহায়িকাই চাকৰি এৰিবলগীয়া হৈছিল৷