এমাহৰ সময়সীমাৰে উচ্ছেদৰ জাননী জাৰি প্রশাসনৰ

নিয়মীয়া বাৰ্তা ২৬ নৱেম্বৰঃ গুৱাহাটী মহানগৰীৰ হাজাৰ হাজাৰ বিঘা চৰকাৰী ভূমি বেদখলকাৰীৰ কবলত আছে৷ শেহতীয়াকৈ কামৰূপ মহানগৰ জিলা উপায়ুক্ত বিশ্বজিৎ পেগুৱে মহানগৰীৰ চৰকাৰী, ৰাজহুৱা খণ্ড, ধর্মীয় অনুষ্ঠান, দাতব্য ন্যাস আদিৰ ভূমি বেদখল সন্দর্ভত গুৱাহাটী উচ্চ ন্যায়ালয়ত তথ্যসহকাৰে দাখিল কৰিছিল৷ গুৱাহাটী উচ্চ ন্যায়ালয়ৰ নির্দেশমর্মে চৰকাৰী কার্যালয়, অনুষ্ঠান–প্রতিষ্ঠান আদিৰ নামত চৰকাৰীভাৱে আবণ্টিত, সংৰক্ষিত ভূমিৰ পৰা বেদখল উচ্ছেদ কৰাৰ বাবে কামৰূপ মহানগৰ জিলা প্রশাসনে নির্দেশ জাৰি কৰিছে৷ ন্যায়ালয়ৰ নির্দেশ মানি কামৰূপ মহানগৰ জিলাৰ উপায়ুক্ত বিশ্বজিৎ পেগুৱে ৩০ দিনৰ সময়সীমা ধার্য কৰি বেদখল কৰি থকা ভূমি নিশ্চিতভাৱে খালী কৰি দিবৰ বাবে জাননী জাৰি কৰিছে৷ যোৱা ২১ নৱেম্বৰত উপায়ুক্ত পেগুৱে অসম ভূমি ৰাজহ অধিনিয়ম ১৮৮৬ সংশ্লিষ্ট নীতিৰ অধীনত উচ্ছেদ কৰিব বুলি জাননী জাৰি কৰে৷ বেদখলকাৰীসকললৈ ব্যক্তিগতভাৱে কোনো জাননী জাৰি নকৰে বুলি নির্দেশটোত স্পষ্ট কৰি দিছে৷ কামৰূপ মহানগৰ জিলা প্রশাসনৰ এই নির্দেশৰ পাছতে চৰকাৰী ভূমি বেদখল কৰি বসবাস কৰা লোকসকলৰ মাজত হাহাকাৰ পৰিস্থিতিৰ সৃষ্টি হৈছে৷ তথ্য অনুসৰি খাৰঘুলিস্থিত অসম ৰাজ্যিক গৃহ নির্মাণ পৰিষদৰ ২৫০ বিঘা ভূমিৰ বহু অংশ বেদখলকাৰীৰ কবলত আছে৷ একেদৰে কাহিলিপাৰাত থকা দিব্যাংগ ছাত্র–ছাত্রীৰ বাবে থকা ২ বিঘা ভূমি বেদখলকাৰীৰ কবলত আছে৷ লোকনির্মাণ বিভাগৰ দিছপুৰ সংমণ্ডলৰ সোণাপুৰ, বৰবাৰী আৰু নাৰেংগীত থকা ভূমিও বেদখলকাৰীৰ কবলত আছে৷ আনহাতে দক্ষিণগাঁৱত থকা ভূতত্ত্ব আৰু খনন বিভাগৰ কেইবাবিঘা ভূমি বেদখলকাৰীৰ কবলত আছে৷ তদুপৰি লালমাটিত থকা ভৱিষ্যনিধি সংগঠনৰ ১০ বিঘা ভূমি, উলুবাৰীত থকা লোকপ্রিয় গোপীনাথ বৰদলৈ যক্ষ্মা চিকিৎসালয়ৰ ভূমি, গোটানগৰত থকা ভূমি সংৰক্ষণ বিভাগৰ ভূমি বেদখলকাৰীৰ কবলত আছে৷ বশিষ্ঠৰ জলসম্পদ বিভাগৰ ২৭ বিঘা ভূমি, উলুবাৰী আৰু মৈদাম গাঁৱত থকা কৃষি বিভাগৰ ১৪০ বিঘা ভূমি, পাণবাৰীৰ নেচনেল টেক্সটাইল কর্প’ৰেচনৰ ১৪০ বিঘা ভূমি বেদখলকাৰীৰ কবলত আছে৷ ইফালে, জ্যোতি চিত্রবন, বশিষ্ঠ দেৱালয়ৰ ভূমি বেদখল কৰি শতাধিক পৰিয়ালে বসবাস কৰি আছে৷ গুৱাহাটী মহানগৰীৰ চৰকাৰী ভূমি বেদখলমুক্ত কৰাৰ বাবে জিলা প্রশাসনে ৩০ দিনৰ সময়সীমা দি জাননী জাৰি কৰিছে যদিও বেদখলকাৰীক উচ্ছেদ কৰিবলৈ সক্ষম হ’ব নে নহয়, সেয়া সময়েহে ক’ব৷