মহানগৰীত অস্বাস্থ্যকৰ পৰিৱেশত মাছ–মাংস বিক্রী

নিয়মীয়া বাৰ্তা ১৮ ফেব্ৰুৱাৰীঃ গুৱাহাটী পৌৰ নিগম কর্তৃপক্ষৰ চূড়ান্ত দায়িত্বহীনতাই মহানগৰবাসীৰ জীৱনলৈ ভাবুকি কঢ়িয়াই আনিছে৷ পৌৰ নিগম কর্তৃপক্ষৰ গাফিলতিৰ সুযোগ লৈ মহানগৰীৰ বিভিন্ন স্থানত একাংশ অসাধু ব্যৱসায়ীয়ে অস্বাস্থ্যকৰ পৰিৱেশত মাছ–মাংস বিক্রী কৰি আহিছে৷ দীর্ঘদিন ধৰি এই বিষয়টোৱে সংবাদ মাধ্যমৰ শিৰোনাম দখল কৰি অহাৰ পাছতো ৰহস্যজনকভাৱে গুৱাহাটী পৌৰ নিগম কর্তৃপক্ষই কার্যকৰী ব্যৱস্থা গ্রহণ নকৰাটো আশ্চর্যজনকভাৱে বিবেচিত হৈছে৷ পৌৰ নিগমৰ দায়িত্বহীনতাৰ বাবেই জনস্বাস্থ্যলৈ ভাবুকি কঢ়িয়াই অস্বাস্থ্যকৰ, পূতিগন্ধময় পৰিৱেশত অসাধু ব্যৱসায়ীয়ে মাছ–মাংস বিক্রী কৰি আহিছে৷ মহানগৰীৰ উজানবজাৰ, লাখটকীয়া, ফটাশিল আমবাৰী, গণেশগুৰি, বেলতলা, ছয়মাইল, বশিষ্ঠ, বামুণীমৈদামকে ধৰি বিভিন্ন স্থানত অস্বাস্থ্যকৰ পৰিৱেশত মাছ–মাংস বিক্রী কৰি আহিছে অসাধু ব্যৱসায়ীসকলে৷ কিন্তু গুৱাহাটী পৌৰ নিগম কর্তৃপক্ষই এই অসাধু ব্যৱসায়ীৰ বিৰুদ্ধে অভিযান চলোৱা পৰিলক্ষিত হোৱা নাই৷ গুৱাহাটী পৌৰ নিগমৰ অনুজ্ঞাপত্র অবিহনে মহানগৰীৰ হাজাৰ হাজাৰ ব্যৱসায়ীয়ে অস্বাস্থ্যকৰ পৰিৱেশত মাছ–মাংস বিক্রী কৰি আহিছে৷ মহানগৰীত মাছ–মাংস বিক্রীৰ বাবে জিএমচি কর্তৃপক্ষই কেতবোৰ নীতি–নির্দেশনা জাৰি কৰিছিল৷ কিন্তু অসাধু ব্যৱসায়ীসকলে পৌৰ নিগম কর্তৃপক্ষই জাৰি কৰা নীতি–নির্দেশনা উলংঘাৰে বছৰৰ পাছত বছৰ ধৰি ব্যৱসায় কৰি মুনাফা লুটি আহিছে৷ পৌৰ নিগমৰ বিষয়া–কর্মচাৰীৰে থকা গোপন বুজাবুজিৰ বাবেই অসাধু ব্যৱসায়ীসকলৰ বিৰুদ্ধে অভিযান চলোৱাৰ পৰা বিৰত থকাৰ অভিযোগ উত্থাপন কৰিছে সচেতন লোকসকলে৷ বিভিন্ন সময়ত অস্বাস্থ্যকৰ পৰিৱেশত মাছ–মাংস বিক্রী কৰা ব্যৱসায়ীৰ বিৰুদ্ধে পৌৰ নিগম কর্তৃপক্ষক মহানগৰবাসীয়ে লিখিত আৰু মৌখিকভাৱে অভিযোগ দি আহিছে৷ ৰাইজৰ অভিযোগৰ পাছতে নিয়মমাফিক অভিযান চলাই দায়িত্ব সামৰিছে জিএমচিৰ বিষয়া–কর্মচাৰীয়ে৷ গুৱাহাটী পৌৰ নিগম কর্তৃপক্ষৰ দায়িত্বহীনতা, চূড়ান্ত হেমাহিৰ বাবে মহানগৰবাসীয়ে অস্বাস্থ্যকৰ পৰিৱেশত বিক্রী কৰা মাছ–মাংস ক্রয় কৰিবলগীয়া হৈ আহিছে৷ মহানগৰীত অস্বাস্থ্যকৰ পৰিৱেশত মাছ–মাংস বিক্রী বন্ধ কৰাৰ বাবে পৌৰ নিগম কর্তৃপক্ষই কি ব্যৱস্থা গ্রহণ কৰে, সেয়া লক্ষণীয় হ’ব৷