নিয়মীয়া বাৰ্তা ২৪ ফেব্ৰুৱাৰীঃ মার্কিন মহাকাশ গৱেষণা সংস্থা নাছাই ৰঙা গ্রহ মঙললৈ প্রেৰণ কৰা ৰ’ভাৰ পার্ছেভাৰেন্সে প্রেৰণ কৰা অৱতৰণৰ মুহূর্তৰ ছবি কালি মুকলি কৰি দিয়া হৈছে৷ হাই ডেফিনেচন কেমেৰাৰ জৰিয়তে অৱতৰণৰ মুহূর্ত বন্দী কৰি ৰখা হৈছে এই ৰ’ভাৰটোত৷ মঙলৰ জেজেৰ’ গহ্বৰত পার্ছেভাৰেন্স অৱতৰণৰ সময়ৰ ভিডিঅ’ মঙলবাৰে নাছাই মুকলি কৰি দিয়াৰ লগে লগে বিশ্বজুৰি বিষয়টোক লৈ চর্চা চলিছে৷ পেৰাছ্যুটৰ জৰিয়তে ৰঙা গ্রহৰ পৃষ্ঠ পার্ছেভাৰেন্সে স্পর্শ কৰাৰ মুহূর্ত দেখিবলৈ পোৱা গৈছে এই ভিডি’ত৷ ৩ মিনিটৰ এই ভিডিঅ’ত গ্রহটোৰ ৰঙা ধূলি উৰা দৃশ্য প্রত্যক্ষ কৰি নাছাৰ বিজ্ঞানীসকল উৎসুক হৈ পৰিছে৷
স্মর্তব্য যে সাত মাহ পূর্বে পার্ছেভাৰেন্স ৰ’ভাৰ মঙল অভিমুখে প্রেৰণ কৰিছিল নাছাই৷ বহু প্রতীক্ষাৰ পিছত ১৯ ফেব্রুৱাৰীত মঙলৰ পৃষ্ঠ স্পর্শ কৰে ৰ’ভাৰটোৱে৷ পৃথিৱীত বহি মঙলৰ পৃষ্ঠত ৰ’ভাৰটোৱে স্পর্শ কৰা বিৰল এই ভিডি’ই বিজ্ঞানৰ ক্ষেত্রখনত সৃষ্টি কৰিছে আলোড়ন৷