দক্ষিণ-মধ্য টেক্সাছত বানপানীৰ তাণ্ডৱ, য’ত অন্ততঃ ১৩জন লোকৰ মৃত্যু ঘটিছে আৰু গ্ৰীষ্মকালীন শিবিৰৰ ২০ৰো অধিক ছোৱালী নিখোজ হৈ পৰিছে। গুৱাডালুপে নদী কেৱল ৪৫ মিনিটত ৰেকৰ্ডভঙা ২৬ ফুট ওফৰি উঠিছিল, যাৰ ফলত স্থানীয় বাসিন্দা আৰু শিবিৰত থকা শিশুসকল আচম্বিতে বিপদত পৰে। প্ৰায় ৭৫০জন শিশুৰ উপস্থিতিত ৪ জুলাইত দীঘল ছুটীৰ অন্তৰ্গত কাম্প মিষ্টিকত ভয়ংকৰ বান হয়, য’ত শিবিৰ পৰিচালকে জনায় যে তাত বিদ্যুৎ, পানী বা ৱাই-ফাই কোনোটো উপলব্ধ নহয়।
ছচিয়েল মিডিয়াত পোষ্ট হোৱা ভিডিঅ’সমূহত দেখা যায়, পানীয়ে ঘৰ আৰু গছসমূহ ধ্বংস কৰি গৈছে। কিছুমান স্থানত ১২ ইঞ্চিলৈকে বৰষুণ হোৱাৰ ফলত এই বন্যা হোৱা বুলি জানিব পৰা গৈছে– যি কেঅৰ কাউণ্টীৰ বাৰ্ষিক বৰষুণৰ প্ৰায় এক-তৃতীয়াংশ। টেক্সাছৰ গৱৰ্ণৰ গ্ৰেগ এবট্এ এটা উদ্ধাৰ অভিযানৰ ভয়ংকৰ ভিডিঅ’ শ্বেয়াৰ কৰে, য’ত দেখা যায় এজন উদ্ধাৰকাৰীয়ে হেলিকপ্টাৰৰ পৰা উৰন্ত অৱস্থাত থকা এজন লোকক এডাল গছৰ পৰা উদ্ধাৰ কৰে। তেওঁ কয়, “এনে উদ্ধাৰ অভিযান ৰাউণ্ড-দ্য-ক্লক চলি আছে। আমি সকলো লোকক বিচাৰি উলিওৱা নোপোৱা পর্যন্ত বিশ্ৰাম নলওঁ।”
ইপিনে, অঞ্চলটোলৈ ৫০০তকৈ অধিক উদ্ধাৰ কৰ্মচাৰী আৰু ১৪টা হেলিকপ্টাৰ প্ৰেৰণ কৰা হৈছে, আৰু টেক্সাছ নেচনেল গাৰ্ড আৰু ইউ. এছ. কষ্ট গাৰ্ডেও সহায় আগবঢ়াইছে। ৰাজ্যিক জনসুৰক্ষা পৰিচালকে সতৰ্ক কৰে যে ছান এণ্টোনিঅ’ আৰু অ’ষ্টিনৰ কাষৰ অঞ্চলত পুনৰ এটা বৰষুণৰ ঢৌ আহিব। তেওঁ কয়, “বৰষুণ অলপ মন্দাইছে, কিন্তু আমি জানো যে আন এটা ঢৌ আহি আছে।” কেঅৰ কাউণ্টীৰ জজ ৰব কেলীয়ে কয় যে গুৱাডালুপে নদী উপত্যকাটো আমেৰিকাৰ আটাইতকৈ বিপজ্জনক নদী উপত্যকাসমূহৰ ভিতৰত এখন বুলি গণ্য।
উদ্ধাৰ অভিযান অব্যাহত আছে, আৰু বিষয়ববীয়াই গুৱাডালুপে নদীৰ কাষৰ উচু অঞ্চললৈ স্থানান্তৰ হোৱাৰ বাবে নাগৰিকসকলক আহ্বান জনাইছে। এই নতুন বন্যা ঘটনাটো জুন মাহৰ মাঝত ছান এণ্টোনিঅ’ত হোৱা আন এখন প্ৰাণঘাতী ফ্লাছ বন্যাৰ পাছতে ঘটিল, য’ত অন্ততঃ ১০জনৰ মৃত্যু হৈছিল। বিষয়ববীয়াই এতিয়াও নিখোজসকলক বিচাৰি উলিয়াবলৈ আৰু ক্ষতিগ্ৰস্তসকলক সহায় কৰিবলৈ কঠোৰ প্ৰচেষ্টা চলাই আছে।
Niyomiya Barta Desk, Date of Published, 5 July