দেশজুৰি অস্থিৰতা : চতুৰ্থ দিনাও ৬০০ বিমানৰ উৰণ বাতিল Indigo-ৰ

দেশৰ আটাইতকৈ বৃহৎ বিমান সেৱা IndiGo কেইদিনমান ধৰি স্থায়ী অব্যৱস্থাৰ সন্মুখীন হৈছে। যোৱা চাৰি দিন ধৰি উৰণত বিলম্ব আৰু বাতিলৰ ঘটনাই যাত্ৰীসকলৰ ৰোষ তীব্ৰ কৰিছে। কেৱল ৫৫০ৰো অধিক উৰণ বাতিল হোৱাৰ ফলত দিল্লী, হাইদৰাবাদ, গোৱাৰ পৰা মুম্বাইলৈ বহুকেইটা বৃহৎ বিমানবন্দৰতেই অচলাৱস্থাৰ পৰিৱেশ সৃষ্টি হয়।

দিল্লী বিমানবন্দৰত হাজাৰ হাজাৰ বাগেজ ঠায়ে ঠায়ে বিভ্ৰান্তিৰ দৰে পৰি আছিল। বহু যাত্ৰী মাটিতে শুবলৈ বাধ্য হয়— সকলো একেলগে মিলি সম্পূৰ্ণ বিশৃংখল পৰিস্থিতিৰ সৃষ্টি হয়। আজিও দিল্লী বিমানবন্দৰৰ ২০০ৰো অধিক IndiGo উৰণ বাতিল হৈছে— ইয়াত ১৩৫খন প্ৰস্থান আৰু ৯০খন আগমন উৰণ অন্তৰ্ভুক্ত হৈছে।

যাত্ৰীৰ অভিযোগ— “আমাৰ বেগ একেবাৰে হেৰাইছে। ১২ ঘণ্টা হ’ল Indigo একো কথা নকয়। এইটো মানসিক পীড়ন।” আৰু এগৰাকী মহিলাই কয়, “১৪ ঘণ্টা হ’ল, না ঘৰ, না পানী। কৰ্মচাৰীক  কোৱা মানেই উত্তৰ নাই।”

বিভিন্ন চহৰত বাতিল হোৱা Indigo বিমানসমূহ- মুম্বাই- ১১৮, বেংগালুৰু- ১০০, হাইদৰাবাদ- ৭৫ কলকাতা- ৩৫, চেন্নাই- ২৬, গোৱা- ১১, ভূপাল- ৫।

Indigoই দাবী কৰা অনুুসৰি— নতুন Crew Duty Rules অনুসৰি প্রয়োজনীয় সদস্য সংখ্যাৰ ভুল মূল্যায়ন, শীতকালীন শ্লট পৰিবৰ্তন, প্ৰযুক্তিগত সমস্যা আৰু ষ্টাফৰ ঘাটিৰ বাবে এতিয়া এই অৱস্থা।

DGCA-লৈ দিয়া প্ৰতিবেদনত IndiGo জানাইছে— নতুন পাইলট Crew Duty Rule সাময়িকভাৱে পিছুৱাই দিয়া হৈছে, নৈশ দায়িত্বৰ বাবে সময় সীমা ৫ৰ পৰা ৬ বজাত বৃদ্ধিৰ নিয়ম বাতিল, ৰাতিৰ দুটা লেণ্ডিং সীমাও সাময়িকভাৱে উঠাই দিয়া হৈছে।

IndiGoই দিয়া জাননী দিয়ে— সূচী সম্পূৰ্ণ স্বাভাৱিক হ’বলৈ ২–৩ দিন সময় লাগিব। ৮ ডিচেম্বৰৰ পৰা উৰণ সংখ্যা কমাই ৰখা হৈছে যাতে বিশৃংখলতা নিয়ন্ত্রণত আনিব পৰা যায়।

ডিজিটেল ডেস্ক, ৫ ডিচেম্বৰ