নিয়মীয়া বাৰ্তা ২৭ জুলাইঃ পৃথিৱীত মানৱ সমাজ আগন্তুক দুটা দশকৰ ভিতৰত ধ্বংস হৈ যাব পাৰে৷ ১৯৭২ চনতে আমেৰিকাৰ মাছাছুছেটছ প্রযুক্তি প্রতিষ্ঠান (এম আই টি)য়ে চলোৱা এক অধ্যয়নত এই সতর্কবাণী কৰিছিল৷ অধ্যয়নত উল্লেখ কৰা হৈছিল যে মানৱ সমাজৰ বৃহৎ অংশ ধ্বংসৰ মুখত পৰিব৷ শেহতীয়াকৈ কে পি এম জি ইণ্টাৰনেচনেলৰ এগৰাকী বিশেষজ্ঞ তথা গৱেষিকা গায়া হেৰিংটনে উল্লেখ কৰিছে যে এম আই টিৰ সতর্কবাণী সত্য প্রমাণিত হোৱাৰ সম্ভাৱনাই অধিক৷ গায়া হেৰিংটন হৈছে নেদাৰলেণ্ডৰ এক বহুজাতিক নেটৱর্ক কে পি এম জি ইণ্টাৰনেচনেলৰ গৱেষিকা৷
এম আই টিৰ অধ্যয়নৰ তথ্য কিমান সঁচা হ’ব পাৰে তাক লৈ নতুন গৱেষণা চলাইছিল গায়াই৷ এই অধ্যয়নত ১০টা গুৰুত্বপূর্ণ বিষয়ক ভিত্তি হিচাপে বাছি লৈছিল গৱেষিকাগৰাকীয়ে৷ এই বিষয়বোৰৰ ভিতৰত আছে জনসংখ্যা, ঔদ্যোগিক উৎপাদন, মানুহৰ উর্বৰা শক্তি, খাদ্য উৎপাদন, প্রদূষণৰ পর্যায় আদি গুৰুত্বপূর্ণ উপাদানবোৰ৷ এই সকলো উপাদান শেহতীয়াকৈ মানুহৰ কল্যাণৰ বিপক্ষে থিয় দিয়া বুলি উল্লেখ কৰিছে গায়া হেৰিংটনে৷