নিয়মীয়া বাৰ্তা, ২৩ জানুৱাৰীঃ দেশজুৰি ক’ভিড–১৯ৰ সংক্রমণ বৃদ্ধি পাই থকাৰ পৰিপ্রেক্ষিতত উত্তৰ প্রদেশকে ধৰি ৫ ৰাজ্যত ফেব্রুৱাৰীত অনুষ্ঠিত হ’বলগীয়া নির্বাচনক লৈ কঠোৰ দেশৰ নির্বাচন আয়োগ৷ উত্তৰ প্রদেশ, উত্তৰাখণ্ড, পঞ্জাব, মণিপুৰ আৰু গোৱাত নির্বাচনী প্রক্রিয়া চলি থকাৰ মাজতে নির্বাচন আয়োগে প্রথমে ১৫ জানুৱাৰী, পিছলৈ ২২ জানুৱাৰীলৈ নির্বাচনী সমাৱেশ, ৰোড শ্ব’ নিষিদ্ধ কৰে৷ দেশত ক’ভিডৰ সংক্রমণ বর্তমানো শংকাজনক হৈ থকাৰ পৰিপ্রেক্ষিততে নির্বাচন আয়োগে আজি এই নিষেধাজ্ঞা ৩১ জানুৱাৰীলৈ সম্প্রসাৰণ কৰিছে৷ কেন্দ্রীয় স্বাস্থ্য মন্ত্রালয়ৰ সৈতে নির্বাচন আয়োগ আৰু ৰাজ্যকেইখনৰ নির্বাচনী বিষয়াই ভার্চুৱেলী বৈঠক সম্পন্ন কৰাৰ পিছতে এই নিষেধাজ্ঞা ঘোষণা কৰা হৈছে৷
উল্লেখ্য যে নির্বাচন আয়োগে দলসমূহৰ ক্ষেত্রত নির্বাচনী প্রচাৰক লৈ কিছু শিথিলতাও আজি জাৰি কৰিছে৷ বিশাল সমাৱেশৰ পৰিৱর্তে সর্বাধিক ৫০০ লোকৰ উপস্থিতিত প্রার্থীসকলে ২৮ জানুৱাৰীৰ পৰা নির্ধাৰিত মুকলি স্থানত সভা অনুষ্ঠিত কৰিব পাৰিব৷ নির্ধাৰিত স্থানত ৫০ শতাংশৰ উপস্থিতিৰে নির্বাচন সভা আয়োজন কৰিব পাৰিব৷ প্রথম পর্যায় ১০ ফেব্রুৱাৰীৰ ক্ষেত্রত এই শিথিলতা নির্বাচন আয়োগে জাৰি কৰিছে৷ আনপিনে ঘৰে ঘৰে প্রচাৰ চলোৱা অভিযানত সর্বাধিক ৫ৰ পৰা ১০জন লোকে অংশগ্রহণ কৰিব পাৰিব৷ নির্বাচন আয়োগৰ মুখ্য নির্বাচন আয়ুক্ত সুশীল চন্দ্রাই ক’ভিড–১৯ৰ পৰিপ্রেক্ষিতত জাৰি কৰা নিষেধাজ্ঞা কঠোৰভাৱে বলৱৎ কৰিবলৈ সংশ্লিষ্ট ৰাজ্যসমূহক নির্দেশ দিছে৷ এইক্ষেত্রত ৰাজ্য কেইখনৰ মুখ্য সচিব আৰু জিলা দণ্ডাধীশে ক’ভিড প্রট’কল মানি চলাৰ ক্ষেত্রত ৰাজনৈতিক দলসমূহৰ কার্যকলাপ নিৰীক্ষণ কৰিব৷ উল্লেখ্য যে অহা ১০ ফেব্রুৱাৰীৰ পৰা প্রথম পর্যায়ৰ ভোটগ্রহণ আৰম্ভ হৈ ৭ মার্চত সামৰণি পৰিব৷ ১০ মার্চত ফলাফল ঘোষণা কৰা হ’ব৷