নিয়মীয়া বাৰ্তা, ১৯ জানুৱাৰীঃ আঞ্চলিকতাবাদী ৰাজনীতি পৰিহাৰ কৰি অচিৰেই ৰাষ্ট্রীয় দল বিজেপিত যোগ দিব ধেমাজিৰ বিধায়ক তথা গণশক্তিৰ অন্যতম শক্তিশালী নেতা ভুবন পেগুৱে৷ শাসকীয় দলটোত ভুবন পেগুৰ যোগদানৰ নিশ্চয়তা আজি সদৰী কৰিলে স্বাস্থ্যমন্ত্রী ড০ হিমন্ত বিশ্ব শর্মাই৷ সোমবাৰে ধেমাজিত এক চাইকেল ৰেলীত অংশগ্রহণ কৰা মন্ত্রীগৰাকীয়ে বিধায়ক পেগুৰ বিজেপিত যোগদান সন্দর্ভত কয়– ভুবন পেগুৱে বিজেপিত যোগদান কৰাৰ সিদ্ধান্ত সম্পূর্ণ হৈছে৷ দুই–এদিনতে আনুষ্ঠানিকতা সম্পন্ন কৰা হ’ব৷
উল্লেখ্য যে লখিমপুৰ–ধেমাজিকে ধৰি উত্তৰ অসমত শক্তিশালী ৰূপত গণশক্তিৰ উত্থানৰ আঁৰত আছিল বিধায়ক ভুবন পেগু আৰু জনজাতীয় নেতা ৰণোজ পেগু৷ জোনাই সমষ্টিৰ উপ–নির্বাচনৰ জৰিয়তে ৰণোজ পেগু বিজেপিলৈ অহাৰ পাছত ভুবন পেগুৰ বিজেপিত যোগদানক লৈও শেহতীয়াকৈ যথেষ্ট চর্চা চলিছিল৷
আনকি, অলপতে বিধায়ক পেগুৱে গুৱাহাটীলৈ অহা কেন্দ্রীয় গৃহমন্ত্রী অমিত শ্বাহক সাক্ষাৎ কৰিছিল৷ আজি জ্যেষ্ঠ মন্ত্রী ড০ হিমন্ত বিশ্ব শর্মাই কয় যে অহা নির্বাচনত বিজেপিৰ প্রতীক লৈয়েই নির্বাচনত অৱতীর্ণ হ’ব ভুবন পেগু৷ ইফালে, কালি ধেমাজি জিলাৰ জোনাইত টিএমপিকেৰ সোণালী জয়ন্তী বর্ষৰ শুভাৰম্ভ কার্যসূচীত অংশগ্রহণ কৰাৰ পাছত কালি মন্ত্রী ড০ শর্মাই ধেমাজিত এক দিনজোৰা কার্যসূচীত অংশ লয়৷ এক চাইকেল ৰেলীত অংশগ্রহণ কৰা মন্ত্রীগৰাকীক চিচিবৰগাঁওস্থিত ৰাষ্ট্রীয় ঘাইপথত চিচিবৰগাঁও কলেজৰ সমীপত বিপুলভাৱে শ শ লোকে উষ্ম আদৰণি জনায়৷ কেইবাখনো বিদ্যালয়ৰ ছাত্র–ছাত্রীৰ লগতে বিজেপিৰ কার্যকর্তাসকলে ফুল চটিয়াই গামোচা, চেলেং পিন্ধাই সম্ভাষণ জনায়৷