ঐতিহাসিক লৰ্ডছ-ত আজি ইতিহাস ৰচিবনে টীম ইণ্ডিয়াই

লর্ডছ টেষ্টত জয়ৰ গোন্ধ পাইছে টীম ইণ্ডিয়াই৷ ঘৰুৱা দল ইংলেণ্ডে লর্ডছত চলি থকা তৃতীয়খন টেষ্টত জয়ৰ বাবে ভাৰতীয় দলক ১৯৩ ৰানৰ লক্ষ্য বান্ধি দিছে৷

ইংৰাজ বাহিনীয়ে তৃতীয়দিনা কোনো উইকেট নেহেৰুওৱাকৈ কৰা ২ ৰানৰ পৰা ইনিংছ মুকলি কৰিবলৈ আহি ভাৰতীয় দলটোৰ সুনিয়ন্ত্রিত বলিঙৰ সন্মুখত বেটিং বিপর্যয়ৰ সন্মুখীন হয়৷ ৱাশ্চিংটন সুন্দৰৰ লগতে যশপ্রীত বুমৰাহ আৰু মহম্মদ চিৰাজৰ দুর্দান্ত বলিঙৰ সন্মুখত ইংলেণ্ডে মাত্র ১৯২ ৰানত দ্বিতীয় ইনিংছ সামৰিবলৈ বাধ্য হয়৷

আগদিনাৰ অপৰাজিত বেটাৰদ্বয় জেক ক্র’লি আৰু বেন ডাকেটে ঘৰুৱা দলটোক সুন্দৰ আৰম্ভণি দিয়াত ব্যর্থ হয়৷ দলীয় স্ক’ৰ ২২ ৰানত ডাকেটৰ ৰূপত প্রথমটো উইকেট হেৰুৱায় ইংলেণ্ডে৷ ডাকেটে ১২ ৰান কৰি বিদায় লয়৷ ডাকেট আউট হোৱাৰ পিছতে ঘৰুৱা দলটোৱে বিপর্যয়ৰ সন্মুখীন হয় আৰু ইটোৰ পিছত সিটো উইকেট হেৰুৱাবলৈ ধৰে৷

জেক ক্র’লিয়ে ২২ ৰান কৰি বিদায় লয়৷ ইপিনে অ’লি প’পে মাত্র ৪ ৰানত পেভিলিয়নমুখী হয়৷ দলটোৰ হৈ জ’ ৰুটে সর্বাধিক ৪০ ৰানৰ অৱদান আগবঢ়ায়৷ অধিনায়ক বেন ষ্ট’কছে ৩৩ আৰু হেৰী ব্রুকে ২৩ ৰান কৰি বিদায় লয়৷ ৰুট আৰু অধিনায়ক ষ্ট’কছৰ মাজত পঞ্চম উইকেটত সর্বাধিক ৬৭ ৰান সংগ্রহ হয়৷ ইফালে জেমি স্মিথে বিশেষ উন্নত প্রদর্শন দাঙি ধৰাত ব্যর্থ হয়৷ মাত্র ৮ ৰান কৰি ৱাশ্চিংটন সুন্দৰৰ বলত ব’ল্ড আউট হয়৷

ক্রিছ ৱ’কছে ১০ ৰানৰ অৰিহণা আগবঢ়ায়৷ ভাৰতীয় দলটোৰ হৈ ৱাশ্চিংটন সুন্দৰে সর্বাধিক ৪টা উইকেট লাভ কৰাৰ লগতে যশপ্রীত বুমৰাহ আৰু মহম্মদ চিৰাজ উভয়ে দুটাকৈ তথা নীতিশ কুমাৰ ৰেড্ডী আৰু আকাশদীপ উভয়ে এটাকৈ উইকেট লাভ কৰে৷ ইপিনে ১৯৩ ৰানৰ জয়ৰ লক্ষ্যৰে ইনিংছ মুকলি কৰিবলৈ আহি চতুর্থ দিনাৰ অন্তত ভাৰতীয় দলটোৱে ১৭.৪ অভাৰত চাৰিটা উইকেট হেৰুৱাই ৫৮ ৰান সংগ্রহ কৰিছে৷

অ’পেনাৰ লোকেশ ৰাহুলে ৩৩ ৰানত অপৰাজিত হৈ থকাৰ বিপৰীতে অধিনায়ক গিল, যশস্বী জয়ছোৱাল, কৰুণ নায়াৰ আৰু আকাশদ্বীপ আউট হয়।

Niyomiya Barta Desk, 14 July, 2025