ভাৰতৰ ব্রাহ্ম’ছ ক্ষেপণাস্ত্র ক্রয় কৰিব ফিলিপাইনছে

নিয়মীয়া বাৰ্তা ২৯ জানুৱাৰীঃ দক্ষিণ চীন সাগৰত বেইজিঙক প্রত্যাহ্বান জনাবলৈ এইবাৰ ভাৰতৰ দ্বাৰস্থ হ’ল ফিলিপাইনছ৷ বিশ্বৰ দ্রুততম ছুপাৰছ’নিক ব্রাহ্ম’ছ ক্রুইজ ক্ষেপণাস্ত্র ভাৰতৰ পৰা ক্রয় কৰাৰ সিদ্ধান্ত লৈছে পূব এছিয়াৰ দেশখনে৷ ইতিমধ্যে দুয়োখন দেশৰ মাজত এক চুক্তিও স্বাক্ষৰ হৈছে৷ আজি স্বাক্ষৰ হোৱা চুক্তি অনুসৰি, ৩৭৫ নিযুত মার্কিন ডলাৰৰ বিনিময়ত ভাৰতৰ পৰা ব্রাহ্ম’ছ ছুপাৰছ’নিক ক্রুইজ ক্ষেপণাস্ত্র লাভ কৰিব ফিলিপাইনছে৷ অর্থাৎ ভাৰতীয় টকাৰ হিচাপত ২,৭৭০ কোটি টকাৰ বিনিময়ত এই ক্ষেপণাস্ত্র ভাৰতৰ পৰা লাভ কৰিব ফিলিপাইনছে৷ স্মর্তব্য যে শব্দৰ গতিবেগতকৈও তিনিগুণ দ্রুত এই ব্রাহ্ম’ছ ক্ষেপণাস্ত্রৰ গতিবেগ৷ ঘণ্টাত ৪,৩২১ কিঃমিঃ বেগেৰে শত্রুৰ ওপৰত আঘাত কৰিবলৈ সক্ষম এই ক্ষেপণাস্ত্রৰ প্রতি ফিলিপাইনছৰ আছে গভীৰ আস্থা৷ এই চুক্তিৰ দ্বাৰা সেই কথা স্পষ্ট হৈ পৰিছে৷ ফিলিপাইনছৰ ৰাষ্ট্রীয় সুৰক্ষা বিভাগৰ তৰফৰ পৰা ব্রাহ্ম’ছ এৰোস্পেচ প্রাইভেট লিমিটেডলৈ নটিছ অৱ এৱার্ড পঠিওৱা হৈছিল৷

অৱশেষত স্বাক্ষৰিত হ’ল চূড়ান্ত চুক্তি৷ ফিলিপাইনছৰ এই পদক্ষেপক দক্ষিণ এছিয়াৰ কূটনৈতিক প্রেক্ষাপটত অতি গুৰুত্বপূর্ণ বুলি ধাৰণা কৰা হৈছে৷ লক্ষণীয়ভাৱে ভাৰতে প্রথম কোনো বিদেশী ৰাষ্ট্রক এই ব্রাহ্ম’ছ ক্ষেপণাস্ত্র বিক্রী কৰাৰ চুক্তি স্বাক্ষৰ কৰিছে৷ ফিলিপাইনছৰ পিছত ইণ্ডোনেছিয়া আৰু ভিয়েটনামেও এই ক্ষেপণাস্ত্র ভাৰতৰ পৰা ক্রয় কৰিব পাৰে বুলি ধাৰণা কৰা হৈছে৷ লক্ষণীয়ভাৱে পূব এছিয়াৰ ৰাষ্ট্রসমূহে এই অত্যাধুনিক ব্রাহ্ম’ছ ক্ষেপণাস্ত্র ক্রয় কৰিলেই দক্ষিণ চীন সাগৰীয় অঞ্চলত বেইজিঙৰ বিৰুদ্ধে সৃষ্টি হ’ব তীব্র প্রত্যাহ্বান৷ শেহতীয়াকৈ পূব এছিয়াৰ দেশসমূহৰ দৃষ্টিত চীনৰ সৈতে মতানৈক্য থকা ভাৰত দক্ষিণ চীন সাগৰত সমৰাস্ত্র যোগান ধৰা দেশ হিচাপে চিহ্ণিত হ’ব পাৰে৷