নিয়মীয়া বাৰ্তা, ২২ জানুৱাৰীঃ জিলা প্রশাসনৰ কঠোৰ নিষেধাজ্ঞাৰ পিছতো বোন্দাত পাহাৰৰ ৰঙামাটি কাটি একাংশ অসাধু ব্যৱসায়ীয়ে ৰমৰমীয়া ব্যৱসায় চলাই আছে ৷ প্রাপ্ত তথ্য অনুসৰি নাৰেংগী খণ্ড বন কার্যালয়ৰ অধীনৰ বোন্দাৰ বিশেষকৈ চপাইডং, ঘুলিগাঁও, খাৰঘুলিকে ধৰি বহুকেইটা অঞ্চলত একাংশ ব্যৱসায়ীয়ে ব্যাপক হাৰত অবৈধভাৱে পাহাৰত খনন চলাইছে ৷ অসাধু ব্যৱসায়ীসকলে স্থানীয় বন বিষয়া–কর্মচাৰীৰ লগত গোপন বুজাবুজি কৰি দিনৰ ভাগতে নির্বিঘ্নে পিক–আপ ভান আৰু মিনি ট্রাকৰ সহায়ত ৰঙামাটি কঢ়িয়াই আছে ৷ ইতিমধ্যে স্থানীয় ইটাভাতাৰ স্বত্বাধিকাৰীসকলেও জে চি বিৰ সহায়ত ব্যাপক হাৰত ৰঙামাটি খনন চলাই নিজ নিজ ভাতাত মজুত কৰা পৰিলক্ষিত হৈছে ৷ নিশা ইটাভাতাৰ মালিকসকলে ডাম্পাৰৰ সহায়ত ৰঙামাটিৰ বৃহৎ দ’ম মজুত কৰাৰ পিছতে লোকচক্ষুৰ পৰা আঁতৰাই ৰখাৰ বাবে তাৰ ওপৰত বালিমাটি ছটিয়াই লয় ৷ যাৰ পৰিপ্রেক্ষিতত পুৱাৰ ভাগলৈ ৰঙামাটিৰ চিন–চাব প্রায় নোহোৱা হৈ পৰে ৷ আৰক্ষী আৰু নাৰেংগী খণ্ড বন কার্যালয়ৰ খণ্ড বন বিষয়াগৰাকীৰ ছত্রছায়াত এই খনন চলি থকাৰ অভিযোগ উত্থাপিত হৈছে ৷