নিয়মীয়া বাৰ্তা, ২০ এপ্ৰিলঃ ফুটবল বিশ্বকাপৰ পূর্বে ভাৰত, পাকিস্তান আৰু ইৰানৰ নাগৰিকৰ বাবে ভিছাৰ ক্ষেত্রত বৃহৎ সালসলনি ঘটাবলৈ আগবাঢ়িছে আয়োজক দেশ কাটাৰ৷ দেশখনত উপস্থিত হৈ ভিছা পোৱাৰ ক্ষেত্রত এইবাৰ যথেষ্ট সুবিধা হ’ব এই তিনিখন দেশৰ নাগৰিকৰ৷ যোৱা ১৪ এপ্রিলৰ পৰাই এই নতুন নিয়ম কার্যকৰী হৈছে৷ কাটাৰৰ গৃহ মন্ত্রালয়ৰ তৰফৰ পৰা জনোৱা হৈছে যে এইবাৰৰ পৰা কাটাৰলৈ যোৱাৰ পিছত বিনামূল্যে পর্যটন ভিছা লাভ কৰিব ভাৰত, পাকিস্তান আৰু ইৰানৰ নাগৰিকে৷ প্রাথমিকভাৱে এমাহৰ বাবে ভিছা দিয়া হ’ব আৰু পিছত এই ভিছাৰ সময়সীমা দুমাহলৈ বৃদ্ধি কৰা হ’ব পাৰে৷ সেই ভিছা পাবলৈ হ’লে পূর্বৰ পৰাই দেশখনৰ কোনো হোটেলত বুকিং থাকিব লাগিব৷ সেই বুকিং এটি নির্দিষ্ট ৱেবছাইটৰ জৰিয়তে কৰিব লাগিব৷ ইয়াৰ লগতে কাটাৰলৈ যোৱা ব্যক্তিৰ হাতত থাকিব লাগিব বৈধ পাছপ’ট আৰু দেশলৈ ওভতাৰ টিকট৷ এই নথি দেখুৱালেই লাভ কৰিব বিনামূল্যে ভিছা৷
অৱশ্যে কাটাৰলৈ যোৱাৰ ক্ষেত্রত কিছু স্বাস্থ্য নির্দেশনা মানি চলাৰো পৰামর্শ দিয়া হৈছে৷ কাটাৰত পদার্পণ কৰাৰ ৪৮ ঘণ্টা পূর্বে নিগেটিভ আৰ টি পি চি আৰ প্রতিবেদন লগত নিব লাগিব৷ দেশখনৰ ক’ভিড বিধি–নিষেধো সকলোৱে মানি চলিব লাগিব৷ ২১ নৱেম্বৰৰ পৰা কাটাৰ বিশ্বকাপ৷ প্রতিযোগিতাৰ টিকটৰ দাম আই পি এলৰ কিছু অংশৰ টিকটৰ দামতকৈও কম হোৱাত ইতিমধ্যে ভাৰতৰ পৰা যথেষ্ট সঁহাৰি পাইছে৷ সমগ্র বিশ্বৰ টিকটৰ চাহিদাৰ নিৰিখত ভাৰতে সপ্তম স্থান লাভ কৰিছে৷ এইবাৰ ভাৰতসহ তিনিখন দেশৰ নাগৰিকৰ বাবে ভিছাৰ নিয়ম সলনি কৰাত অধিকসংখ্যক দর্শকৰ দেশখনলৈ আগমন ঘটাৰ সম্ভাৱনা আছে৷