নিয়মীয়া বাৰ্তা ৩১ জানুৱাৰীঃ বছৰটোৰ প্রথমটো সন্মানীয় গ্রেণ্ডশ্লাম অ’ষ্ট্রেলিয়ান অ’পেনৰ খিতাপ জয়ৰ স্বপ্ন ধূলিস্যাৎ হ’ল ছুইজাৰলেণ্ডৰ কিংবদন্তি খেলুৱৈ ৰ’জাৰ ফেডেৰাৰৰ৷ মেলব’নত পূর্ণগতিত চলি থকা গ্রেণ্ডশ্লামখনৰ পুৰুষ ছিংগলছৰ ছেমিফাইনেলত অভিযান সামৰিলে ২০বাৰৰ গ্রেণ্ডশ্লাম ফেডেৰাৰে৷ মেলব’ন পার্কত বৃহস্পতিবাৰে অনুষ্ঠিত পুৰুষ ছিংগলছৰ প্রথমখন ছেমিফাইনেলত তৃতীয় বাছনিৰ ফেডেৰাৰে ডিফেণ্ডিং চেম্পিয়ন তথা তৃতীয় বাছনিৰ ছার্বিয়াৰ ন’ভাক জক’ভিচৰ হাতত আত্মসমর্পণ কৰে৷ সাতবাৰৰ চেম্পিয়ন জক’ভিচে ফেডেৰাৰক ৭–৬, ৬–৪, ৬–৩ ছেটত পৰাস্ত কৰি অষ্টমবাৰৰ বাবে অষ্ট্রেলিয়ান অ’পেনৰ ফাইনেল খেলাৰ যোগ্যতা অর্জন কৰে৷ উল্লেখ্য যে ২০০৭ চনৰ পৰাই জক’ভিচে মেলব’ন পার্কত ফেডেৰাৰৰ হাতত পৰাজয় স্বীকাৰ কৰা নাই৷ অষ্ট্রেলিয়ান অ’পেনত এতিয়ালৈকে দুয়োগৰাকীয়ে পাঁচবাৰ মুখামুখি হৈছে আৰু আটাইকেইবাৰেই ছার্বিয়ান খেলুৱৈগৰাকীয়ে শেষ হাঁহি মাৰিবলৈ সক্ষম হৈছে৷ ফাইনেলত জক’ভিচে জার্মানীৰ আলেকজেণ্ডাৰ জেৰেভ আৰু ডমিনিক থিয়েমৰ মাজত হ’বলগীয়া দ্বিতীয়খন ছেমিফাইনেলৰ বিজয়ীগৰাকীৰে মুখামুখি হ’ব৷ ইফালে, মহিলা শাখাৰ ছিংগলছৰ ফাইনেলত প্রতিদ্বন্দ্বিতা আগবঢ়াব আমেৰিকাৰ প্রতিভাৱান খেলুৱৈ ছ’ফিয়া কেনিন আৰু স্পেইনৰ গার্বিন মুগুৰুজাই৷ মহিলা শাখাৰ ছিংগলছৰ বৃহস্পতিবাৰে অনুষ্ঠিত ছেমিফাইনেল মেচ এখনত চতুর্দশ বাছনিৰ ছ’ফিয়া কেনিনে বিশ্বৰ শীর্ষ বাছনিৰ এছলে বার্টিক পৰাস্ত কৰি প্রথমবাৰৰ বাবে গ্রেণ্ডশ্লামৰ ফাইনেল খেলাৰ যোগ্যতা অর্জন কৰে৷
২০০৮ চনত আনা ইভান’ভিকৰ পিছত সর্বকনিষ্ঠ খেলুৱৈ হিচাপে অষ্ট্রেলিয়ান অ’পেনৰ ফাইনেলত প্রৱেশ কৰা কেনিনে এছলে বার্টিক এঘণ্টা ৪৫ মিনিটৰ যুঁজৰ অন্তত ৭–৬ (৬), ৭–৫ ছেটত পৰাস্ত কৰে৷ ইফালে, দুবাৰৰ গ্রেণ্ডশ্লাম বিজয়ী গার্বিন মুগুৰুজাই আনখন ছেমিত বিশ্বৰ তৃতীয় বাছনিৰ ৰোমানিয়াৰ ছিমনা হালেপক ৭–৬ (৮), ৭–৫ ছেটত পৰাস্ত কৰে আৰু কেৰিয়াৰত প্রথমবাৰৰ বাবে অষ্ট্রেলিয়ান অ’পেনৰ ফাইনেলত প্রৱেশ কৰে৷