নিয়মীয়া বাৰ্তা, ৭ ফেব্ৰুৱাৰীঃ বাংলাদেশে ১৯ বছৰ অনূর্ধ্ব বিশ্বকাপ ক্রিকেট প্রতিযোগিতাৰ দেওবাৰে হ’বলগীয়া ফাইনেল মেচখনত চাৰিবাৰৰ চেম্পিয়ন ভাৰতৰে মুখামুখি হ’ব৷ দক্ষিণ আফ্রিকাত পূর্ণগতিত চলি থকা প্রতিযোগিতাখনৰ কালি প’টছেফষ্ট্রুমত অনুষ্ঠিত দ্বিতীয়খন ছেমিফাইনেলত বাংলাদেশে নিউজিলেণ্ডক ৬ উইকেটত পৰাস্ত কৰি ফাইনেল খেলাৰ যোগ্যতা অর্জন কৰে৷
মেচখনত নিউজিলেণ্ডে জয়ৰ বাবে বান্ধি দিয়া ২১২ ৰানৰ লক্ষ্য অনুসৰণ কৰিবলৈ আহি মাহমুডুল হাছান জয়ৰ দুর্দান্ত ১০০, তৌহিদ হূদয় আৰু শ্বাহাদাত হুছেইন উভয়ৰে ৪০ ৰানৰ সহায়ত বাংলাদেশে ৪৪.১ অভাৰত ৪টা উইকেট হেৰুৱাই বিজয় লক্ষ্যত উপনীত হয়৷ ইয়াৰ পূর্বে প্রথমে বেটিং কৰিবলৈ আহি বি হুইলাৰ–গ্রিনালৰ ৭৫ আৰু লিডষ্টনৰ ৪৪ ৰানৰ সহায়ত নিউজিলেণ্ডে ৫০ অভাৰত ৮টা উইকেট হেৰুৱাই ২১১ ৰান কৰিছিল৷