টাইগাৰ শ্রফ অভিনীত ‘বাগী’ ছবিখনে মুক্তিৰ পিছতে যথেষ্ট জনপ্রিয়তা অর্জন কৰিছিল৷ দর্শকেও আদৰি লৈছিল৷ এইবাৰ ‘বাগী’ৰ তৃতীয় খণ্ড মুক্তিৰ বাবে সাজু হৈছে৷ বাগী–৩ৰ মুখ্য চৰিত্রত অভিনয় কৰিছে টাইগাৰ শ্রফে৷ টাইগাৰৰ লগতে অভিনয় কৰিছে শক্তি কাপুৰৰ কন্যা শ্রদ্ধা কাপুৰে৷ লগত আছে জনপ্রিয় অভিনেতা ৰিতেশ দেশমুখ৷
বাগী–৩ৰ কাহিনীভাগ আগবাঢ়িছে এনেদৰে– ছবিখনত ৰণবীৰ (ৰনি)ৰ চৰিত্রত অভিনয় কৰিছে টাইগাৰ শ্রফে৷ ৰনিৰ ভাতৃ বিক্রমক (ৰিতেশ) যথেষ্ট মৰম কৰে৷ যিকোনো বিপদতে বিক্রমক সহায়ৰ বাবে দৌৰি উপস্থিত হয় ৰনি৷ আনকি বিপদত বিক্রমে ৰনিকেই চিঞৰে৷ তেতিয়াই ৰনি দৌৰি আহে সহায়ৰ বাবে৷
ছবিখনত শ্রদ্ধা হ’ল ৰনিৰ প্রেমিকা৷ শ্রদ্ধায়ো কেইবাটাও ‘একচন’ দৃশ্যত অভিনয় কৰা দেখা যাব৷ ইফালে, বিক্রম হ’ল পুলিচৰ এজন চিপাহী৷ এদিন বিক্রমে ৰনিৰ সৈতে ভিডি’ কলত কথা পাতি থাকোঁতে কেইজনমান গুণ্ডা প্রকৃতিৰ লোকে বিক্রমক মাৰপিট কৰিলে৷ ৰনিক চিঞৰি মাতিলে বিক্রমে৷ ৰনি দৌৰি আহিল সহায়ৰ বাবে৷ তাৰ পিছতে আৰম্ভ হয় ৰনিৰ একচন…৷ এনেদৰেই একচন, ৰোমাঞ্চ, থ্রিলাৰেৰে আগবাঢ়িছে বাগী–৩৷ ছবিখনত অভিনয় কৰিছে টাইগাৰ শ্রফ, ৰিতেশ দেশমুখ, শ্রদ্ধা কাপুৰ, অংকিতা লোখণ্ডে, বিজয় বার্মা, অনু কাপুৰ আদিয়ে৷
ইতিমধ্যে ৬ ফেব্রুৱাৰীত ছবিখনৰ ট্রেইলাৰ মুক্তি দিয়াৰ পিছতে যথেষ্ট জনপ্রিয়তা অর্জন কৰিছে৷ মার্চৰ প্রথম সপ্তাহত বহু অপেক্ষিত ছবিখন চিত্রগৃহলৈ অহাৰ সম্ভাৱনা আছে৷