🔹 প্রতিষ্ঠানখনক লোক-ঔষধৰ ৰাষ্ট্ৰীয় প্ৰাণকেন্দ্র হিচাপে বিকশিত কৰা হ’ব : সর্বানন্দ সোণোৱাল
বিশেষ বাৰ্তা, ২৬ ডিচেম্বৰ : “হাজাৰ হাজাৰ বছৰ ধৰি মানৱ সমাজক আৰোগ্যৰ দিশত পথ প্রশস্ত কৰি অহা লোক-ঔষধৰ এক সমৃদ্ধ ঐতিহ্য আছে ।এই ঐতিহ্য উত্তৰ-পূর্বাঞ্চলতো সমৃদ্ধিশালীভাৱে বিৰাজমান, যিয়ে প্ৰজন্মৰ পাছত প্রজন্ম ধৰি জীৱন সমৃদ্ধ কৰাত সহায় কৰি আহিছে।”- কেন্দ্ৰীয় বন্দৰ, জাহাজ পৰিবহণ আৰু জলপথ তথা আয়ুস মন্ত্ৰী সৰ্বানন্দ সোণোৱালে উত্তৰ-পূব আয়ুর্বেদ আৰু লোক-ঔষধ গৱেষণা প্রতিষ্ঠানত ক্ষমতা সম্প্ৰসাৰণৰ আধাৰশিলা স্থাপন কৰি এনেদৰে কয়। অৰুণাচলৰ পাছিঘাটত আয়োজিত এক গাম্ভীৰ্যপূৰ্ণ অনুষ্ঠানত ভাষণ প্রদান কৰি কেন্দ্ৰীয় মন্ত্ৰী সৰ্বানন্দ সোণোৱালে কয়- হাজাৰ হাজাৰ বছৰ ধৰি মানৱ সমাজক আৰোগ্যৰ দিশত পথ প্রশস্ত কৰি অহা লোক-ঔষধৰ এক সমৃদ্ধ ঐতিহ্য আছে। এই ঐতিহ্য উত্তৰ-পূর্বাঞ্চলতো সমৃদ্ধিশালীভাৱে বিৰাজমান, যিয়ে প্ৰজন্মৰ পাছত প্রজন্ম ধৰি জীৱন সমৃদ্ধ কৰাত সহায় কৰি আহিছে। প্রধানমন্ত্রী নৰেন্দ্ৰ মোদীৰ দূৰদৰ্শী নেতৃত্বত আমাৰ স্বাস্থ্যসেৱা ব্যৱস্থাক শক্তিশালী কৰাৰ বাবে লোক-ঔষধকে ধৰি পৰম্পৰাগত ঔষধ তথা চিকিৎসা পদ্ধতিক পুনৰুজ্জীৱিত কৰাৰ দিশত নিৰন্তৰ প্ৰয়াস কৰা হৈছে। এই প্ৰচেষ্টাৰ অংশ হিচাপে আমাৰ চৰকাৰে অৰুণাচলৰ নৰ্থ ইষ্টার্ণ ইনষ্টিটিউট অৱ আয়ুর্বেদ এণ্ড ফ’ক মেডিচিন ৰিছাৰ্চত অতিৰিক্ত আন্তঃগাঁথনি নিৰ্মাণৰ বাবে বিনিয়োগ কৰিব, যিয়ে উত্তৰ-পূৰ্বাঞ্চলত আয়ুর্বেদ আৰু লোক-ঔষধৰ গৱেষণা তথা বিকাশ শক্তিশালী কৰাৰ ক্ষেত্রত অনুঘটক হিচাপে কাম কৰাৰ ক্ষমতা তথা দক্ষতা গঢ়ি তুলিব। প্রতিষ্ঠানখনৰ আন্তঃগাঁথনি সম্প্ৰসাৰণৰ ভিতৰত আছে এটা একাডেমিক ভৱন, ছাত্ৰ-ছাত্ৰীসকলৰ বাবে হোষ্টেল, কৰ্মচাৰীৰ কোৱাৰ্টাৰ, পৰিচালকৰ বাংলো আদি। এই বিনিয়োগে আয়ুর্বেদত স্নাতক পাঠ্যক্রম, আয়ুর্বেদ ঔষধ আৰু অস্ত্রোপচাৰৰ স্নাতক পাঠ্যক্ৰমৰ লগতে যথা সময়ত স্নাতকোত্তৰ পাঠ্যক্রম আগবঢ়োৱাৰ বাবে আয়ুর্বেদ মহাবিদ্যালয় খোলাৰ দিশত অতিৰিক্ত আন্তঃগাঁথনি নির্মাণত সহায় কৰিব।
পাছিঘাটৰ এই নতুন আয়ুর্বেদ মহাবিদ্যালয়খনে শিক্ষা, গৱেষণা আৰু সম্প্ৰসাৰিত সেৱাৰ জৰিয়তে আয়ুৰ্বেদৰ প্ৰচাৰ-প্ৰসাৰত গুৰুত্বপূৰ্ণ ভূমিকা পালন কৰিব। অনুষ্ঠানত ভাষণ প্রদান কৰি অৰুণাচল প্ৰদেশৰ মুখ্যমন্ত্ৰী পেমা খাণ্ডুৱে কয়- “আমি অত্যন্ত সুখী যে অৰুণাচল প্ৰদেশৰ এখন অগ্রণী প্রতিষ্ঠান- নর্থ ইষ্টার্ণ ইনষ্টিটিউট অৱ আয়ুর্বেদ এণ্ড ফ’ক মেডিচিন বিছাৰ্চে উত্তৰ-পূব ভাৰতৰ লোক-ঔষধৰ সমৃদ্ধি ত্বৰান্বিত কৰাৰ দিশত নিৰৱচ্ছিন্নভাৱে কাম কৰি আছে। প্রধানমন্ত্রী নৰেন্দ্ৰ মোদীৰ নেতৃত্বত প্ৰতিষ্ঠানখনৰ ক্ষমতা তথা আন্তঃগাঁথনি সম্প্ৰসাৰিত কৰা হৈছে, যিয়ে অঞ্চলটোৰ পৰম্পৰাগত ঔষধৰ ত্বৰান্বিতকৰণত সহায় কৰাৰ লগতে আমাৰ পৰম্পৰাগত ঔষধ তথা চিকিৎসা পদ্ধতিক ইয়াৰ পৰম্পৰাগত ভৌগোলিক ক্ষেত্ৰৰ বাহিৰতো প্ৰসাৰিত কৰাত সবল ভূমিকা পালন কৰিব। প্ৰধানমন্ত্ৰীয়ে সদায় ভাৰতৰ পৰম্পৰাগত ঔষধৰ পুনৰুজ্জীৱিতকৰণত গুৰুত্ব আৰোপ কৰি আহিছে। কিয়নো ই বিভিন্ন ৰোগৰ চিকিৎসা, স্বাস্থ্যসেৱা সমাধান আৰু মানৱ জীৱনৰ এক উন্নত অভিজ্ঞতাৰ পথ কাৰ্যকৰী প্ৰমাণেৰে প্রশস্ত কৰি আহিছে। ফার্মাচিউটিকেল, আয়ুর্বেদিক আৰু সুগন্ধি খণ্ডৰ বাবে যথেষ্ট বাণিজ্যিক সম্ভাৱনা থকা অঞ্চলটোৰ সমৃদ্ধ ঔষধি উদ্ভিদে ৰাজ্যখনৰ বাবে বাণিজ্যিক পথো উন্মুক্ত কৰিব বুলি উল্লেখ কৰি উত্তৰ-পূৰ্বাঞ্চলৰ আয়ুস খণ্ডৰ সৰ্বাংগীণ বিকাশৰ বাবে অহোপুৰুষাৰ্থ কৰা কেন্দ্রীয় মন্ত্রী সর্বানন্দ সোণোৱালক এই ছেগতে মুুখ্যমন্ত্ৰী খাণ্ডুৱে বিশেষ কৃতজ্ঞতা জ্ঞাপন কৰে।এনইআইএএফএমআৰৰ ভূমিকা সম্পর্কে বিশদভাৱে আলোকপাত কৰি কেন্দ্ৰীয় আয়ুস মন্ত্ৰী সৰ্বানন্দ সোণোৱালে কয়- প্রধানমন্ত্রী মোদীৰ দূৰদৰ্শী নেতৃত্বত আমাৰ চৰকাৰে আয়ুর্বেদ, যোগ, ইউনানী, সিদ্ধ, হোমিঅ’পেথী, সোৱা ৰিপা, নেচাৰ’পেথীৰ দৰে পৰম্পৰাগত চিকিৎসাশৈলীক ন ৰূপত আগবঢ়াই লৈ যোৱাৰ দিশত কাম কৰি আছে। আমাৰ দেশখনক আত্মনিৰ্ভৰ কৰি গঢ়ি তোলাৰ দিশত আয়ুস মন্ত্ৰালয়ে আমাৰ চহকী পৰম্পৰাগত ঔষধ তথা ৰোগীৰ চিকিৎসা সেৱা পদ্ধতিক বৈজ্ঞানিক বৈধতাৰে আধুনিক চিকিৎসা বিজ্ঞানৰ সমকক্ষ কৰি তুলিবলৈ কাম কৰি আছে। এই প্ৰচেষ্টাৰ দ্বাৰা কেৱল আমাৰ পৰম্পৰাগত চিকিৎসক সমাজখন উপকৃত হোৱাই নহয়, পৰম্পৰাগত চিকিৎসাৰ পৰিসৰো যথেষ্ট বৃদ্ধি পাব, যাৰ ফলত ই অধিক লোকৰ ওচৰলৈ প্ৰসাৰিত হ’ব। এনইআইএএফএমআৰ প্ৰতিষ্ঠানখন হৈছে ভাৰতৰ এক আগশাৰীৰ আয়ুর্বেদিক আৰু লোক-ঔষধৰ প্ৰতিষ্ঠান, যিয়ে অঞ্চলটোৰ পৰম্পৰাগত চিকিৎসাক পুনৰুজ্জীৱিত কৰাৰ দিশত নিষ্ঠাৰে কাম কৰি আহিছে। আয়ুৰ্বেদৰ চহকী ঐতিহ্য আমাৰ স্থানীয় পৰম্পৰাগত চিকিৎসা পদ্ধতিৰ পৰাও সমৃদ্ধ হ’ব পাৰে। এই ধাৰণাৰে প্রতিষ্ঠানখনে ৰোগীৰ যত্ন তথা নিৰাময়ৰ বাবে আয়ুর্বেদিক পদ্ধতিৰ প্ৰয়োগ কৰিব পাৰে। এই প্রচেষ্টাক আৰু অধিক শক্তিশালী কৰাৰ উদ্দেশ্যে আমি এই প্রতিষ্ঠানখনক পৰম্পৰাগত চিকিৎসাৰ ৰাষ্ট্ৰীয় প্রাণকেন্দ্র হিচাপে গঢ়ি তুলিবলৈ প্রতিশ্রুতিবদ্ধ বুলি কেন্দ্ৰীয় মন্ত্ৰী সোণোৱালে ভাষণত সদৰী কৰে। কেন্দ্ৰীয় মন্ত্ৰীগৰাকীয়ে অৰুণাচল প্ৰদেশত সোৱা ৰিপাৰ এটা কেন্দ্ৰ স্থাপন কৰাৰ কথাও ঘোষণা কৰে। মুঠ ৫৩ কোটি টকা বিনিয়োগৰ সৈতে প্ৰতিষ্ঠানখনত অতিৰিক্ত আন্তঃগাঁথনি বিকশিত কৰা হ’ব। অনুষ্ঠানটোত অৰুণাচল প্রদেশ বিধানসভাৰ অধ্যক্ষ পাচাং দর্জী, অৰুণাচল প্ৰদেশ চৰকাৰৰ মন্ত্ৰী আলো লিবাং, পূব অৰুণাচলৰ সাংসদ (লোকসভা) তাপিৰ গাও, পূব পাছিঘাটৰ বিধায়ক কলিং ময়ং, পশ্চিম পাছিঘাটৰ বিধায়ক নিনোগ এৰিং, অৰুণাচল প্ৰদেশৰ ৰাজ্যিক তথ্য আয়ুক্ত গুমঝুম হায়দৰ, অৰুণাচল প্ৰদেশ ৰাজ্যিক বিশ্ববিদ্যালয়ৰ উপাচার্য অধ্যাপক টমো ৰিবা আৰু অন্যান্য গণ্যমান্য ব্যক্তিসকল উপস্থিত থাকে।
প্ৰেৰক বিভাস দুৱৰা