নিয়মীয়া বাৰ্তা, ২৭ ফেব্ৰুৱাৰীঃ আগন্তুক বিধানসভা নির্বাচনত বিজেপিক পৰাভূত কৰাৰ লক্ষ্যৰে অখিল গগৈৰ নেতৃত্বত গঠন হ’ব এটা নতুন আঞ্চলিক দলৰ৷ মাওবাদীৰে সম্পর্ক ৰক্ষাৰ অভিযোগত সম্প্রতি কাৰাগাৰত বন্দী হৈ থকা কৃষক নেতাজনে নতুন ৰাজনৈতিক দল গঠনৰ চিন্তা–চর্চাৰ কথা স্পষ্ট কৰিছে৷
কাৰাগাৰত বৃহস্পতিবাৰে কৃষক নেতাজনক সাক্ষাৎ কৰিবলৈ যোৱা একালৰ সতীর্থ তথা প্রদেশ কংগ্রেছৰ মুখপাত্র কমল কুমাৰ মেধিৰ আগত ৰাজনৈতিক দল গঠনৰ কথা ব্যক্ত কৰিছে৷ সাক্ষাতৰ অন্তত কমল কুমাৰ মেধিয়ে সাংবাদিকক বিষয়টো সন্দর্ভত কয়– এটা শক্তিশালী আঞ্চলিক ৰাজনৈতিক দল গঠনৰ বাবে অখিল গগৈ সামগ্রিকভাৱে প্রস্তুত৷ এই প্রসংগতে বিজেপিক প্রতিহত কৰাৰ লক্ষ্যৰে ঐক্যবদ্ধ আঞ্চলিক ৰাজনৈতিক দল এটা তেওঁৰ নেতৃত্বত গঠন কৰাৰ কথা উল্লেখ কৰিছে৷ জাতীয়তাবাদী, সংগ্রামী আৰু আপোচহীন ৰাজনৈতিক দল গঠনৰ বাবে অখিল গগৈয়ে যি চিন্তা–চর্চা কৰিছে তাক জাতীয় কংগ্রেছে আদৰণি জনাইছে৷
মন কৰিবলগীয়া যে কাৰাগাৰত অখিল গগৈক কমল কুমাৰ মেধিৰ নেতৃত্বত এটা দলে সাক্ষাৎ কৰি শেহতীয়া ৰাজনৈতিক পৰিস্থিতি সন্দর্ভত দীঘলীয়া আলোচনা কৰে৷ ইফালে কেন্দ্রীয় কাৰাগাৰৰ ভিতৰতে ১ মার্চত অখিল গগৈসহ কাৰাৰুদ্ধ নেতাসকলে ‘কা’ প্রত্যাহাৰৰ দাবীত ২৪ ঘণ্টীয়া অনশন কার্যসূচী ৰূপায়ণ কৰিব৷ এই সন্দর্ভত এক বিবৃতিযোগে কৃষক মুক্তি সংগ্রাম সমিতিয়ে উল্লেখ কৰে যে ‘কা’বিৰোধী মহাসংগ্রামক অধিক উৎসাহিত কৰাৰ বাবে এই আন্দোলনৰ কার্যসূচী গ্রহণ কৰা হৈছে৷ সাময়িকভাৱে দুর্বল হোৱা ‘কা’বিৰোধী ৰাইজৰ সংগ্রাম অধিক তীব্রতৰ কৰাৰ বাবেও কৃষক মুক্তিয়ে আহ্বান জনাইছে৷