নিউজ ডেস্ক, ২১ মার্চঃ তেলেগু চলচ্চিত্রৰ ২৫ তাৰকাৰ বিৰুদ্ধে গোচৰ ৰুজু কৰিলে ৰেৱন্ত ৰেড্ডী নেতৃত্বাধীন তেলেংগানাৰ কংগ্রেছ চৰকাৰে৷ ৰাণা ডগ্গুবতি, প্রকাশ ৰাজ, বিজয় দেৱৰাকোণ্ডাৰ দৰে বিশিষ্ট চিত্র তাৰকাসকলৰ বিৰুদ্ধে তৰা হৈছে এই গোচৰ৷ অবৈধ বেটিং এপৰ বিজ্ঞাপন আৰু প্রচাৰৰ অভিযোগ অনা হৈছে এই ২৫ অভিনেতাৰ বিৰুদ্ধে৷ সেইবাবে প্রতাৰণাসহ একাধিক ধাৰাত গোচৰ ৰুজু হৈছে দক্ষিণৰ এই ছুপাৰষ্টাৰসকলৰ বিৰুদ্ধে৷ জানিব পৰা গৈছে যে অবৈধ বেটিং এপৰ সৈতে যুক্ত অভিনেতা আৰু ছ’চিয়েল মিডিয়া ইনফ্লুৱেন্সাৰসকলৰ্ বিৰুদ্ধে অভিযোগ দাখিল কৰে ফণীন্দ্র শর্মা নামৰ এগৰাকী ব্যৱসায়ীয়ে৷ ব্যৱসায়ীগৰাকীয়ে অভিযোগ কৰা অনুসৰি বিপুল জনপ্রিয় এই চিত্র তাৰকাসকলৰ ছ’চিয়েল মিডিয়া ব্যৱহাৰ কৰি বেটিং সংস্থাবোৰে তেওঁলোকৰ এপ আৰু ৱেবছাইটৰ প্রচাৰ চলাইছে৷ যিহেতু জনপ্রিয় তাৰকাসকল এই বিজ্ঞাপনৰ সৈতে জড়িত, গতিকে সাধাৰণ জনতা প্রভাৱিত হৈছে৷ বিশেষকৈ মধ্যবিত্ত আৰু নিম্ন মধ্যবিত্ত পৰিয়ালসমূহ আকৃষ্ট হৈছে আৰু প্রচুৰ আর্থিক লোকচানৰ সন্মুখীন হৈছে৷ ফণীন্দ্র শর্মাই নিজেও এই বেটিং এপত বিনিয়োগ কৰাৰ কথা ভাবিছিল৷ কিন্তু পৰিয়ালৰ পৰামর্শৰ বাবে তেওঁ সেই কাম নকৰিলে৷ ইয়াৰ পিছতেই ২৫ তাৰকাৰ বিৰুদ্ধে অভিযোগ দাখিল কৰে ফণীন্দ্র শর্মাই৷ মাঞ্চু লক্ষ্মী, প্রণীতা নিধি আগৰৱালা, অনন্যা নাগালা, চিৰি হনুমানথুৰ দৰে তাৰকাসকলৰ বিৰুদ্ধে ফণীন্দ্র শর্মাৰ অভিযোগৰ ভিত্তিতে এজাহাৰ ৰুজু হয়৷ ভাৰতীয় ন্যায় সংহিতাৰ ধাৰা অনুসৰি প্রতাৰণা আৰু আইটি আইনৰ কেইবাটাও ধাৰাত ৰুজু হৈছে গোচৰ৷ কিন্তু চিত্র তাৰকাসকলৰ পৰা এতিয়ালৈকে কোনোধৰণৰ প্রতিক্রিয়া প্রকাশ কৰা হোৱা নাই৷ প্রশ্ণ উঠিছে তেলেংগানা চৰকাৰৰ ভূমিকাক লৈ৷ যোৱা ডিচেম্বৰ মাহত ‘পুষ্পা–২’ ছবিৰ প্রিমিয়াৰত পদপিষ্ট হৈ এগৰাকী লোকৰ মৃত্যু হৈছিল৷ সেই ঘটনাত গ্রেপ্তাৰ কৰা হৈছিল বিখ্যাত অভিনেতা আল্লু অর্জুনক৷ তাৰ পিছৰে পৰা অভিনেতাসকলৰ সৈতে তেলেংগানা চৰকাৰৰ শীতল যুদ্ধ চলি আছে৷ ইয়াৰ মাজতে ব্যৱসায়ী ফণীন্দ্র শর্মাৰ অভিযোগৰ ভিত্তিত তেলেংগানাত ২৫গৰাকী অতি জনপ্রিয় চিত্র তাৰকাৰ বিৰুদ্ধে গোচৰ ৰুজু হোৱা বিষয়টোৱে বিশেষ তাৎপর্য কঢ়িয়াইছে৷ ইয়াত ৰেৱন্ত ৰেড্ডী নেতৃত্বাধীন কংগ্রেছ চৰকাৰৰ নির্দেশনা থকা বুলি ধাৰণা কৰিছে বিশেষজ্ঞ মহলে৷