আজি নাগপুৰৰ পৰা কলকাতালৈ যোৱা ইণ্ডিগোৰ ফ্লাইট ৬ই৮১২ (IndiGo Flight 6E812) উৰা মৰাৰ কিছু সময়ৰ পিছতে এটা সম্ভাৱ্য পক্ষীৰ সৈতে সংঘৰ্ষৰ ঘটনা সংঘটিত হৈছিল। এই বিপজ্জনক পৰিস্থিতিত পাইলটসকলে তৎক্ষণাৎ সতৰ্কতা প্ৰদৰ্শন কৰি বিমানখনক নাগপুৰ বিমানবন্দৰত জৰুৰীকালীন অৱতৰণ (Emergency Landing) কৰায়। পাইলটৰ তৎপৰতা আৰু সঠিক সিদ্ধান্তৰ বাবে বিমানখন নিৰাপদে অৱতৰণ কৰিবলৈ সক্ষম হয়।
নাগপুৰ বিমানবন্দৰৰ জ্যেষ্ঠ নিৰ্দেশকে এই বিষয়ে কয়, “আমাৰ সন্দেহ যে বিমানখনৰ সৈতে পক্ষীৰ সংঘৰ্ষ হৈছে। ঘটনাৰ সঠিক কাৰণ জানিবলৈ তদন্ত চলি আছে। পাইলটে সতৰ্কতা হিচাপে বিমানখনক ঘূৰাই নাগপুৰত অৱতৰণ কৰিছিল।” প্ৰাপ্ত তথ্য অনুসৰি, বিমানখনত ২৭২জন যাত্ৰী আছিল। পক্ষীৰ সৈতে সংঘৰ্ষৰ ফলত বিমানৰ সন্মুখৰ অংশ (নাক) ক্ষতিগ্ৰস্ত হৈছে। বিমানবন্দৰৰ ৰানৱেৰ পৰা পোৱা এখন ছবিত দেখা গৈছে যে এজন বিমানবন্দৰ কৰ্মচাৰী বিমানখনৰ পৰীক্ষা কৰি আছে আৰু বিমানৰ সন্মুখৰ অংশ ক্ষতিগ্ৰস্ত দেখা গৈছে।
একেদৰে কালি পুনেৰ পৰা দিল্লীলৈ যোৱা স্পাইচজেটৰ ফ্লাইট এছজি৯৩৭ (SpiceJet Flight SG937) উৰা মৰাৰ লগে লগে কাৰিকৰী ত্ৰুটিৰ সন্মুখীন হৈছিল। পৰিস্থিতিৰ গুৰুত্ব বিবেচনা কৰি পাইলটসকলে মানক প্ৰক্ৰিয়া অনুসৰণ কৰি বিমানখনক পুনৰ পুনে বিমানবন্দৰত অৱতৰণ কৰাৰ সিদ্ধান্ত লৈছিল। সূত্ৰ অনুসৰি, এই সময়ত বিমানখনৰ জৰুৰীকালীন অৱতৰণ কৰোৱা হৈছিল। কিন্তু স্পাইচজেটৰ আনুষ্ঠানিক বিবৃতিত স্পষ্ট কৰা হৈছে যে বিমানখন নিৰাপদে অৱতৰণ কৰিছিল আৰু সকলো যাত্ৰী স্বাভাৱিকভাৱে বিমানৰ পৰা ওলাই আহিছিল।
Niyomiya Barta Desk, 2 September