জাপানত বছৰৰ শেষ দিনসমূহ আৰু নতুন বছৰৰ ছুটীৰ আৰম্ভণিৰ মাজতেই সংঘটিত হোৱা এক ভয়ংকৰ পথ দুৰ্ঘটনাই সমগ্ৰ দেশখনক জোকাৰি গৈছে। শুকুৰবাৰে নিশা বৰফে ঢকা এটা এক্সপ্ৰেছৱেত বহু বাহন একেলগে সংঘৰ্ষত লিপ্ত হয়। এই দুৰ্ঘটনা আগ্নেয় বিভীষিকালৈ ৰূপান্তৰিত হয়, য’ত এগৰাকী বৃদ্ধাৰ মৃত্যু ঘটে আৰু বহু লোক আহত হয়।
আৰক্ষীৰ মতে, এই দুৰ্ঘটনাটো গুনমা প্ৰদেশৰ মিনাকামি চহৰৰ ওচৰৰ এখন এক্সপ্ৰেছৱেত সংঘটিত হয়। প্ৰাথমিক তদন্তত জানিব পৰা গৈছে যে প্ৰথমে দুখন মালৱাহী ট্ৰাকৰ মাজত সংঘৰ্ষ হয়। ইয়াৰ ফলত পথত যানজঁটৰ সৃষ্টি হয় আৰু পিচফালৰ পৰা আহি থকা বাহনসমূহে বৰফে ঢকা পথত সময়মতে ব্ৰেক লগাব নোৱাৰিলে। পথটো অত্যন্ত পিচল আছিল বাবে এটাৰ পিছত আনখনে বাহনে সংঘৰ্ষ ঘটায় আৰু অলপ সময়ৰ ভিতৰতে এই ঘটনা এক বৃহৎ চেইন এক্সিডেণ্টলৈ ৰূপ লয়। প্ৰাদেশিক হাইৱে পুলিচে নিশ্চিত কৰিছে যে এই দুৰ্ঘটনাত ৫০খনৰো অধিক বাহন পতিত হয়।
দুৰ্ঘটনাৰ শেষ পৰ্যায়ত পৰিস্থিতি অধিক ভয়ংকৰ হৈ পৰে, যেতিয়া কেইবাখনো বাহনত হঠাৎ জুই লাগে। জুই দ্ৰুতগতিত বিয়পি পৰি এডজনৰো অধিক বাহনত জুই লাগে। অগ্নিনিৰ্বাপন বিভাগৰ মতে, জুই নিয়ন্ত্ৰণলৈ আনিবলৈ প্ৰায় সাত ঘণ্টা সময় লাগে। বহু বাহন সম্পূৰ্ণৰূপে জ্বলি ভস্মীভূত হয় যদিও স্বস্তিৰ কথা এই যে জুইৰ ফলত আন কোনো লোকৰ প্ৰাণহানি নহয়।
আৰক্ষীয়ে জনোৱা মতে, এই দুৰ্ঘটনাত ট’কিঅ’ৰ এগৰাকী ৭৭ বছৰীয়া মহিলাই ঘটনাস্থলীতেই প্ৰাণ হেৰুৱায়। ইয়াৰ উপৰি ২৬জন লোক আহত হৈছে, যাৰ ভিতৰত পাঁচজনৰ অৱস্থা গুৰুতৰ বুলি জানিব পৰা গৈছে। সকলো আহতক ওচৰৰ চিকিৎসালয়সমূহত ভৰ্তি কৰোৱা হৈছে আৰু চিকিৎসা চলি আছে। স্বাস্থ্য বিষয়াসকলে গুৰুতৰভাৱে আহতসকলৰ ওপৰত বিশেষ নজৰ ৰাখিছে।
জাপানৰ চৰকাৰী প্ৰচাৰ মাধ্যম এনএইচকে-ৰ মতে, দুৰ্ঘটনাৰ পাছত নিগাটা প্ৰদেশৰ য়ুজাৱা ইণ্টাৰচেঞ্জ আৰু গুনমা প্ৰদেশৰ ছুকিওনো ইণ্টাৰচেঞ্জৰ মাজৰ এক্সপ্ৰেছৱে দুয়ো দিশৰ পৰা বন্ধ কৰি দিয়া হয়। পথত পৰি থকা ধ্বংসাৱশেষ আঁতৰোৱা, জ্বলি যোৱা বাহনসমূহ অপসাৰণ কৰা আৰু তদন্ত সম্পূৰ্ণ নোহোৱালৈকে যান-বাহন চলাচল পুনৰ আৰম্ভ কৰিব পৰা নাযায়। কৰ্তৃপক্ষই এতিয়ালৈকে পথটো কেতিয়া পুনৰ খোলা হ’ব সেয়া স্পষ্ট কৰা নাই।
ডিজিটেল ডেস্ক, ২৭ ডিচেম্বৰ