প্ৰধানমন্ত্ৰী নৰেন্দ্ৰ মোদী শুকুৰবাৰে (১৫ মে’) পাঁচখন দেশ ভ্ৰমণলৈ ৰাওনা হ’ব। এই ভ্ৰমণসূচীৰ প্ৰথম গন্তব্য হ’ব সংযুক্ত আৰব আমিৰাত (UAE)। পশ্চিম এছিয়াত ইৰান আৰু আমেৰিকা-ইজৰাইলৰ মাজত চলি থকা সংঘাতৰ মাজতে প্ৰধানমন্ত্ৰীৰ এই UAE ভ্ৰমণ বিশেষ তাৎপৰ্যপূর্ণ বুলি ধৰা হৈছে।
বৈদেশিক পৰিক্ৰমা মন্ত্ৰালয়ৰ তথ্য অনুসৰি, আগন্তুক ৬ দিনত প্ৰধানমন্ত্ৰীয়ে মুঠ ৫খন দেশ ভ্ৰমণ কৰিব। ১৫ মে’ত সংক্ষিপ্ত ভ্ৰমণসূচীৰে UAE পোৱাৰ পিছত তেওঁ নেদাৰলেণ্ডছলৈ ৰাওনা হ’ব। তাৰ পিছত তেওঁ ছুইডেন আৰু নৰৱে ভ্ৰমণ কৰিব আৰু এই ভ্ৰমণৰ অন্তিম পৰ্যায় হ’ব ইটালী।
সূত্ৰ অনুসৰি, আবু ধাবিত প্ৰধানমন্ত্ৰী মোদীৰ বৈঠকত শক্তি নিৰাপত্তা অন্যতম গুৰুত্বপূৰ্ণ বিষয় হিচাপে উত্থাপিত হ’ব। হিন্দুস্তান টাইমছৰ পূৰ্বৰ প্ৰতিবেদন অনুসৰি, UAE-ৰ ৰাষ্ট্ৰপতি শেখ মোহাম্মদ বিন জায়েদ আল নাহিয়ানৰ সৈতে LPG যোগান আৰু কৌশলগত পেট্ৰ’লিয়াম ভাণ্ডাৰ সম্পৰ্কীয় গুৰুত্বপূৰ্ণ চুক্তিত স্বাক্ষৰ হোৱাৰ সম্ভাৱনা আছে।
আমেৰিকা-ইৰান সংঘাতৰ ফলত হৰমুজ জলসন্ধিত সৃষ্টি হোৱা অস্থিৰতাৰ মাজতে বৈশ্বিক শক্তি সংকট তীব্ৰ হৈ উঠিছে। বৰ্তমান ইৰানে এই গুৰুত্বপূৰ্ণ জলপথত সামুদ্ৰিক যাতায়াতত বাধা সৃষ্টি কৰি আছে বুলি অভিযোগ উঠিছে। ইয়াৰ লগতে আমেৰিকান নৌসেনাই ইৰানী বন্দৰসমূহত নাকাবন্দী কৰাৰ ফলতো উত্তেজনা অধিক বৃদ্ধি পাইছে।
সূত্ৰৰ উদ্ধৃতি দি হিন্দুস্তান টাইমছে প্ৰকাশ কৰা অনুসৰি, ইণ্ডিয়ান অইল কৰ্পোৰেচন (IOC) আৰু আবু ধাবি নেচনেল অইল কোম্পানী (ADNOC)-ৰ মাজত LPG ক্ষেত্ৰত কৌশলগত সহযোগিতা চুক্তি স্বাক্ষৰ হোৱাৰ সম্ভাৱনা আছে। ইয়াৰ লগতে ইণ্ডিয়ান ষ্ট্ৰেটেজিক পেট্ৰ’লিয়াম ৰিজাৰ্ভছ লিমিটেড (ISPRL) আৰু ADNOC-ৰ মাজতো কৌশলগত তেল ভাণ্ডাৰ সম্পৰ্কীয় চুক্তি হোৱাৰ সম্ভাৱনা প্ৰকাশ কৰা হৈছে।
বৈদেশিক পৰিক্ৰমা মন্ত্ৰালয়ে জাৰি কৰা বিজ্ঞপ্তি অনুসৰি, এই UAE ভ্ৰমণৰ মূল উদ্দেশ্য হৈছে ভাৰত আৰু UAE-ৰ মাজত ৰাজনৈতিক, সাংস্কৃতিক, আৰ্থিক আৰু জনসম্পৰ্ক অধিক শক্তিশালী কৰি তোলা।
ডিজিটেল ডেস্ক, ১৫ মে’