নিয়মীয়া বাৰ্তা, ২৫ এপ্ৰিলঃ সমগ্র বিশ্বত মহামাৰীৰ ৰূপ ধাৰণ কৰা মাৰাত্মক ক’ৰোনা ভাইৰাছৰ আতংক পাৰ হৈ যোৱাৰ পিছত সলনি হ’ব ক্রিকেটৰ ৰূপৰেখা৷ –এই তাৎপর্যপূর্ণ মন্তব্য আগবঢ়াইছে ৪৭ বছৰত ভৰি দিয়া ক্রিকেটৰ ভগৱানখ্যাত শচীন তেণ্ডুলকাৰে৷
ৰয়টাৰৰ সৈতে হোৱা এক টেলিফোনিক সাক্ষাৎকাৰত ক্রিকেট বিশ্বৰ অন্যতম শ্রেষ্ঠ বেটছমেনগৰাকীয়ে কয় যে ক’ভিড–১৯ মহামাৰীৰ প্রাদুর্ভাৱৰ বাবে সম্প্রতি সকলো খেল বন্ধ হৈ থকাটো অত্যন্ত দুর্ভাগ্যজনক৷ মহামাৰী পাৰ হৈ যোৱাৰ পিছতো ইয়াৰ প্রভাৱ ক্রীড়া বিশ্বত দেখিবলৈ পোৱাটো নিশ্চিত৷ বিশেষকৈ ক্রিকেটৰ পথাৰত উইকেট দখলৰ পিছত বলাৰে সতীর্থক সাবটি ধৰি উল্লাস প্রদর্শন কৰা অথবা বলৰ উজ্জ্বলতা বৃদ্ধিৰ বাবে ফিল্ডাৰে লেলাউটি আৰু ঘাম ব্যৱহাৰ কৰাৰ পৰম্পৰাগত অভ্যাস পুনৰ দেখিবলৈ পোৱা নাযাব৷
উল্লেখ্য যে চীনৰ পৰা সমগ্র বিশ্বলৈ সম্প্রসাৰিত হোৱা মাৰাত্মক ক’ৰোনা ভাইৰাছৰ সংক্রমণ ৰোধৰ বাবে প্রতিখন দেশে সামাজিক দূৰত্ব আৰু ব্যক্তিগত স্বচ্ছতাৰ ওপৰত সর্বাধিক গুৰুত্ব আৰোপ কৰিছে৷ ইয়াৰ ফলত আগন্তুক দিনত বিশ্বৰ সকলো খেলুৱৈয়ে সামাজিক দূৰত্ব আৰু ব্যক্তিগত স্বচ্ছতাৰ প্রতি লক্ষ্য ৰাখি খেলপথাৰত নমাটো নিশ্চিত৷ ‘মহামাৰীৰ আতংক পাৰ হৈ যোৱাৰ পিছত ক্রিকেটৰ ৰূপৰেখা যথেষ্ট সলনি হোৱাটো নিশ্চিত৷ কিয়নো প্রতিগৰাকী খেলুৱৈয়ে সামাজিক দূৰত্ব আৰু ব্যক্তিগত স্বচ্ছতাৰ কথা মনত ৰাখি সতর্কতা অৱলম্বন কৰিব৷ তেওঁলোকে উইকেট দখলৰ পিছত ইজনে–সিজনক সাবটি ধৰি অথবা কৰমর্দন কৰি উল্লাস প্রদর্শনৰ পৰা বিৰত থাকিব৷ ক্রিকেটৰ আন এটি পৰম্পৰাগত প্রথা হ’ল বলৰ উজ্জ্বলতা বৃদ্ধিৰ বাবে লেলাউটি অথবা ঘামৰ ব্যৱহাৰ৷ ক’ৰোনা ভাইৰাছৰ পিছৰ পর্যায়ত এই পৰম্পৰা হয়তো আমি কেতিয়াও দেখিবলৈ নাপাম৷’ তেণ্ডুলকাৰে এইদৰে কয়৷
মন কৰিবলগীয়া যে ১৯৮৯ চনত মাত্র ১৬ বছৰ বয়সতে টেষ্ট অভিষেক ঘটোৱা প্রাক্তন ক্রিকেটাৰগৰাকীয়ে শুকুৰবাৰে ৪৭সংখ্যক জন্মদিন উদযাপন কৰে৷