নিয়মীয়া বাৰ্তা, ৩০ এপ্রিলঃ বুধবাৰে গুৱাহাটী প্রেছ ক্লাবৰ উদ্যোগত ইণ্ডিয়ান অইল কর্প’ৰেচন লিমিটেডে প্রদান কৰা ইনফ্রাৰেড থার্মেল স্কেনাৰ গুৱাহাটীৰ মুঠ ৩৫টা বাতৰিকাকত আৰু ইলেক্ট্রনিক মাধ্যমৰ প্রতিষ্ঠানলৈ আগবঢ়োৱা হয় ৷ গুৱাহাটী প্রেছ ক্লাবৰ সভাপতি মনোজ কুমাৰ নাথৰ পৌৰোহিত্যত গুৱাহাটী প্রেছ ক্লাবৰ প্রাংগণত অনুষ্ঠিত অনুষ্ঠানৰ আঁত ধৰে গুৱাহাটী প্রেছ ক্লাবৰ সম্পাদক সঞ্জয় ৰায় আৰু সহঃ সম্পাদিকা মনীষা কলিতাই ৷ অনুষ্ঠানত ইণ্ডিয়ান অইল কর্প’ৰেচন লিমিটেডৰ মহাপ্রবন্ধক পি কে কাকতিয়ে বিশ্বৰ এই মহা সংকটৰ সময়ত ক’ৰোনা ভাইৰাছৰ সংক্রমণ প্রতিৰোধ কৰাৰ ক্ষেত্রত বিশেষ গুৰুত্বপূর্ণ এইবিধ সঁজুলি সংবাদ কর্মীসকলৰ স্বাস্থ্য পৰীক্ষাত সহায়ক হ’ব বুলি কয় ৷ অনুষ্ঠানত ইণ্ডিয়ান অইল কর্প’ৰেচনৰ মুখ্য প্রবন্ধক আৰ কে দেউৰী, প্রবন্ধক ভাস্কর্য প্রতীক বৈশ্য, সহযোগী প্রবন্ধক শেখৰজ্যোতি দত্ত উপস্থিত থাকে৷ অনুষ্ঠানৰ আৰম্ভণিতে গুৱাহাটী প্রেছ ক্লাবৰ তৰফৰ পৰা ইণ্ডিয়ান অইল কর্প’ৰেচন লিমিটেডৰ বিষয়াসকলক ফুলাম গামোচাৰে কৃতজ্ঞতা জনোৱা হয় ৷ অনুষ্ঠানৰ শেষত শলাগৰ শৰাই আগবঢ়ায় গুৱাহাটী প্রেছ ক্লাবৰ সাংস্কৃতিক সম্পাদিকা পল্লৱী বৰাই ৷