নিয়মীয়া বাৰ্তা, ৫ মেঃ ক্রিকেটৰ তিনিওটা ফর্মেটতে দক্ষিণ আফ্রিকাৰ হৈ খেলাৰ ইচ্ছা ব্যক্ত কৰিছে দেশখনৰ প্রাক্তন অধিনায়ক ফাফ ডু প্লেচিছে৷ এদিনীয়া দলৰ অধিনায়ক পদৰ পৰা অপসাৰণ কৰিলেও অনুতপ্ত নহয় বুলি মন্তব্য কৰি ডু প্লেচিছে কয় যে ২০২০–২১ ছিজনত তেওঁ তিনিওটা ফর্মেটতে জাতীয় দলটোৰ হৈ খেলিবলৈ সাজু৷
তেওঁৰ উপস্থিতিয়ে টেষ্ট দলটোৰ বেটিং বিভাগক অধিক শক্তিশালী কৰি তুলিব বুলি মন্তব্য কৰি প্রাক্তন অধিনায়ক ডু প্লেচিছে লগতে কয় যে দেশখনৰ হৈ তিনিওটা ফর্মেটতে খেলি যাবলৈ পালে তেওঁ অধিক সুখী হ’ব৷ জুলাই মাহৰ শেষৰ ফালে ৱেষ্ট ইণ্ডিজ ভ্রমণ কৰিবলগীয়া দক্ষিণ আফ্রিকা দলটোত স্থান লাভ কৰিব বুলি আশাবাদী ৩৫ বছৰীয়া ডু প্লেচিছ৷